Serchhip damdawi In-a hman turin Bialtu MLA in PPE Set 200 a rawn hlan

Serchhip bialtu MLA, Lalduhoma chuan nimin zing khan Serchhip District Hospital hman turin PPE Set 200 a rawn hlan.
Heng PPE Set hlanna puala inkhawm tawi Serchhip CMO Office kawt-a neih ah bialtu MLA, Lalduhoma chuan PPE chu COVID-19 kai te enkawlna chauh ni lovin hri inkaichhawn theih reng reng enkawlna atan leh Sample lakhawmtute bakah Rapid Test nan te pawhin an mamawh thu sawiin, hei vang hian indaih a harsat thu a sawi a, Serchhip-ah PPE Set kan mamawh tih an hriat avanga a dah tura rawn kal zawk an nih thu leh Lockdown lai a nih avanga bial fan leh programme hran pawh neih theih a nih rihloh thu a sawi a. Hri leng chungchanga Serchhip District dinhmun chu nitin Report te lakhawma a lo ngaihven ve reng thu sawiin, thuneitute nen pawh an inbiak reng thu leh harsatna lian lutuk kan neilo chu lawmawm a tih thu a sawi a, tuna hri kai kan neih pathum te pawh an dinhmun a tha zel nia a hriat thu leh an thatchhuah leh thuai a duhsak thu sawiin, Quarantine Centre-a awm mek te pawh an inkhunghran hun a zawh hunah dam taka an In lama an haw theih a beisei thu a sawi bawk.
Serchhip Bialtu MLA chuan hri leng chungchangah sawrkar Department lama thawktute, NGO te, Veng tina Duty Local Task Force te chu an thawk tha hle tih pawh sawiin, bial mipuite pawh kan bial chhung chauh ni lo, hmun dangah sum leh pai te thawhkhawmin kan luangchhuak nasa hle tih a sawi a, mipuite inpekna ah hian lawmthu a sawi. He hri leng hian eng ang in nge min la tihbuai dawn hriat a nih loh thu pawh sawiin, a zia lam ni tawh tura kan beisei chungin a zuallam ala pan a nih hlauh chuan tun aia nasa a kan la tan tlan zel a tul dawn thu a sawi a, Damdawi In leh khawtlang hruaitute pawhin tul leh mamawh a awm a nih chuan a hnena thlen zel tur leh a theih ang theihtawp kan chhuahtlan tur thu a sawi a. Hri leng dona atana Serchhip bial chhunga tlawmngaia thawk tura inpe kan nei te chu lawmawm a tih thu leh ropui a tih thu a sawi bawk.
Heng PPE Set te hi Serchhip CMO, Dr. Laldawngliana Sailo leh District Medical Superintendent, Dr. ZD. Lalmuanawma te chuan lo dawngsawngin Serchhip CMO chuan hri leng chungchangah hian bialtu MLA hian Serchhip a ngaihsak hle tih a sawi a. Hri leng kan buaipui tirh khan Glove, Mask leh Hand Sanitizers tam tawk tak a rawn pek tawh thu leh tun tumah an mamawh em em, PPE Set a rawn pe chu an lawm hle tih a sawi a. PPE te chu sawrkar Supply atang chuan duh anga indaihzai theih a nih loh avanga a theih ang anga an ngaihtuah thu leh an thui chawp tir thu te a sawi bawk. He hunah hian Serchhip DMS, Dr. ZD. Lalmuanawma leh Serchhip Sub-Hqrs. YMA Vice President, Lalzuiliana te pawhin lawmthu an sawi bawk a ni.

Comments

Chhiar Hlawhte