RT-PCR khaw; sawrkar pe duh an tam thu sawi

Health & Family Welfare Minister, Dr. R. Lalthangliana chuan COVID-19 test theihna, RT-PCR khawl chu lei a, hman tura pek an an duh thu mi thahnemngai ten sawrkar-ah an thlen thin tih sawiin, an thahnem-ngaihna a fakawm rualin inthlahrung taka hnar a ngai thin tih a sawi.
Mipuite hnena thuchah a sawi ah Health Minister chuan RT-PCR khawl chu lei mai theih pawh ni se a khawl mai bakah a ken tel tam tak a nei a, mithiamte chhut dan chuan khawl bun tur hian RT-PCR khawl nuai 20 man vel chhut telin a vaiin cheng nuai 100 vel sen a ngai a ni, a ti a. He khawl hi Medical College, University, Science College leh Central Research Institution Laboratory nei ah te a dah theih mai a, Indian Council of Medical Research (ICMR) pawhin hetiang Institution-Based nilo damdawi In emaw hmun danga RT-PCR khawl bun tur chuan nikhat ah Sample 100 test ziah tur a ni tih dan an nei tih sawiin, Sample test tura bawlhlo ngai zawng zawng nen nikhata sample 100 test na man chu cheng nuai 7 vel a ni, a ti a, hetianga nitin test theih loh chuan ICMR hian test kalpui phalna, licence an tihtawp sak thin niin a sawi bawk.
Heng bakah hian khawl dahna tur Laboratory siam a hautak em em tih pawh sawiin Health Minsiter chuan, a enkawltu tur Doctor, Scientist leh Lab. Technician bakah midang thahnem tak a mamawh tih sawiin, “Full time-a vil tur chuan ZMC Laboratory-a khawl pakhat ah mi 25 bawr an awm a ngai,” a ti a. Hetih mek lai hian RT-PCR khawl ang tluk tho a tha leh hman, senso hautak lo zawk, ICMR pawhin a phal TrueNAT Quattro chu District tinah dah tum a ni, a ti a. “Ni khatah sample 45-50 vel a test theih bakah Sample test nan hian darkar khat vel bak a ngai lova, COVID-19 bakah natna dang tam tak test theih a ni dawn a, a tangkai dawn hle a ni,” a ti bawk.
Health Minister chuan natna chimawm leh hriatchian hleihtheih loh kan hmachhawn lai a nih thu pawh sawiin, “Kan fimkhur hle a ngai a, sawrkarin tih tur leh tih loh tur a ruahman te tha taka kan zawm reng a pawimawh rih dawn a, mipuite pawhin dawhtheihna kan neih a ngai,” tiin sawrkar hmalakna ring ngam turin mipuite chu a chah bawk.
Hetihlai hian Zirtawpni khan Congress Legislature Party Leader leh Thorang bialtu MLA ni bawk, Zodintluanga chuan COVID-19 vei leh vei loh test na khawl, Real Time-PCR (RT-PCR) chu Lunglei Civil Hospital-a hman turin Lunglei DC, District Level Tast Force-a Chairman ni bawk hnenah a hlan a, a hmanna tur Civil Hospital-ah an dah nghal a ni a, amaherawhchu Lunglei Dist Hospital lamin dawng thei an nih loh thu an hriat hnuah DC Office-ah hian dahlet leh a ni a, hemi chungchang hian sawizui a hlawhin ti ti a siam tam hle a ni.

Comments

Chhiar Hlawhte