Mizoram-ah hri kai 36.42 enkawl dam an ni tawh; Damdawi In chhuahsan mai tur an la awm bawk

Mizoram-a COVID-19 hri kai hmuhchhuah tawh atangin za zela 36.42 te chu enkawl dam an ni tawh.
Mizoram sawrkar thuchhuah in a tarlan danin nimin khan Mizoram-ah COVID-19 hri kai mi pakhat hmuhchhuah leh niin heti hian Mizoram-a hri kai hmuhchhuah zawng zawng chu mi 151 an ni ta a, nimin-a ZMC Laboratory atanga hri kai hmuhchhuah leh hi Mamit District mi niin hmeichhia kum 23 mi a ni a, Delhi atanga rawn haw, Quarantine Centre-a awmlai a ni. Hemi hmalam Inrinni khan Mizoram-ah hri kai hmuhchhuah mi pahnih an awm bawk a, heng mite hi Mamit District mi hmeichhia leh Aizawl District mi mipa te an ni.
Sawrkar thuchhuah in a tarlan danin nimin thleng khan Mizoram-ah COVID-19 hri kai hmuhchhuah mi 151 awm tawhin heng mite hi mipa 70 leh hmeichhia 81 te an ni a, an zingah hian mi 55 te chuan damdawi In chhuahsan tawhin hei hi za zela chhutin 36.42 an ni a, tunah hian mi 96 enkawl mek an ni. Hri kai hmuhchhuah tam berna District Lunglei-ah mi 45 enkawl mek niin enkawl dam an la awm lova, Aizawl District-ah mi 19 enkawl dam ni tawhin mi 19 enkawl mek an la awm bawk a, Kolasib District-ah mi 10 enkawl dam tawhin enkawl mek pakhat a awm a. Lawngtlai-ah mi 8 leh Saitual-ah mi 3 enkawl dam niin enkawllai an nei tawhlo bawk.
Siaha-ah mi 8 enkawl dam tawhin enkawllai pakhat a awm a, Champhai-ah mi 4 dam tawhin midang 5 enkawl mek an ni a, Mamit-ah mi 19 la enkawl mekin enkawl dam pakhat an awm tawh bawk a, Khawzawl-ah mi 2 enkawl mekin mi pakhat enkawl dam a ni tawh bawk. Serchhip-ah mi pakhat chu damdawi In atanga chhuahtir niin midang 2 enkawl mek an ni thung.
Hetihlai hian COVID-19 hri kai tih hmuhchhuah tawh, ZMC Laboratory-a endik leh hnu a hri an hmuh tak loh zat chu mi 113 an tling tawh nia thudawn a ni a, hemi anga chhut hian hri vei dam tawh hi za zela 74.83 a tling tawh a, amaherawh chu heng mite hian damdawi In an la chhuahsan loh avangin sawrkar in dam tawh-a a puan zingah hian an tel vek lo thung a ni. Official-a an la puan loh, damdawi In-a la awmte hi tunhnai-ah an chhuak fel thuai tura beisei a nih thu Health Department hotute chuan an sawi bawk.
Sawrkar hotute chuan Mizoram pawn atanga tangkhang lo hawte Sample hlawm endik hna zawhfel a ni tawh a.Tum khata Sample tam tak endik avanga nileng zankhua-a endik ngai, a tuk-a result peihfel thin chu tun atang chuan a ni la laa peihfel hman zel a ni tawh dawn a. Thuthar puan hun pawh result peihfel hun azirin a inthlak tawh dawn a ni.

Comments

Chhiar Hlawhte