RT-PCR bun belh zel ai chuan Truenat khawl bun belh mai hi a tha zawk - Health Department

Health Department Sample Test-na atana senso tam leh enkawl hautak zawk RT-PCR bun belh zel ai chuan Truenat khawl bun belh mai chu sawrkar in tha zawkin a hria tih sawiin, Chief Minister pawhin Truenat khawl hi Aizawl pawn District tin ah pakhat zel dah turin lei a rem ti tawh niin an sawi.

Inrinni-a thuchhuah an siamah Health Department chuan COVID-19 hri vei leh vei lo endikna khawl tha ber ni a ngaih chu RT-PCR khawl a ni tih tarlangin, “Hripui thawm kan hriat tirh khan ZMC-a TB Laboratory BSL-2 buatsaih fel tep tawh behchhanin, khawl mamawh tul ang angte la khawmin mithiam bik (Expert) te kaihhruaina hnuaiah hun reilote chhungin RT-PCR khawl chu bun fel a ni. IBSD, Imphal, Manipur atangin khawl pakhat min rawn hmantir hlauh mai a. Hauva & Sons ten hetiang khawl pakhat leina tur sawrkarah an rawn chhunglut bawk a, khawl hi lei tawh niin hman mek a ni,” an ti a. NHM hnuaia lei RT-PCR khawl pakhat pawh alo thleng tep tih sawiin, “Tunah hian khawl pathum in ngawrh takin hna an thawk a, an thawh chak leh zual theihna turin Automated RNA Extractor pawh pakhat lei a ni a, Forensic Science Laboratory, Aizawl atangin hawh a ni bawk a. Lunglei-ah Truenat khawl pahnih in hna a thawk reng bawk a, a dang pakhat pawh bun fel leh tawh a ni. Sample endikna pui ber ZMC-ah chuan sample lakkhawm sa zawng zawng pawh endik zawh a ni tawh nghe nghe a ni,” an ti.

MLA-te leh mi inphal thenkhat ten RT-PCR khawl leina atana sum thawh an inhuam thu an sawi ah sawrkar chuan lawmthu sawiin, “Tuna kan dinhmun thlirin, RT-PCR khawl neih belh zel hi kan mamawh ber a ni em tih uluk taka zirchian hmasak hi sawrkarin tulin a hria a. Expert Team, Lunglei, Siaha leh Champhai-ah tirh a ni a. RT-PCR dahna tur hmun (room) chu an nei ngei a, amah-erawhchu heng Room-te hi nasa taka chei that ngai an ni a. Khawl bun nan Laboratory Equipments engmah an nei lo bawk a, ngaihtuah chawp vek ngai a ni,” tiin RT-PCR khawl in ken tel tam tak a neih bakah ICMR phalna a mamawh thu an sawi.

Tuna khawl pathum awmsa bakah a dang pakhat lo thleng leh mai tur ngaihtuah chung leh COVID-19 sample lak tur lo tlem chho ta zel thlirin, hetiang khawl neih belh zel ai chuan Aizawl District tih loh District Hq.rs zawng zawngah Truenat khawl dah chu Expert Team te ngaihdan a nih thu leh hun lo kal zel turah pawh a tangkai thei hle dawna ngaih a ni tih an sawi bawk.