NH. 54 laih mek DC in tlawh

Serchhip District Bawrhsap, Dr. Lalzirmawia Chhangte chuan Serchhip District paltlangtu NH. 54 laihzauh hna Kram Infracon Pvt. Ltd. ten an thawh mek chu Inrinni khan a hmunah kalin a enfiah.

Kram Infracon Pvt. Ltd. hian Ser-chhip District chhunga Baktawng atanga Keitum inkar kawng laihzau leh siamthat hna KM 50.938-a thui an thawk dawn a, tun dinhmunah formation cutting hi KM 7 an zo tawh a ni. Inrinni-a an hnathawhna hmun tlawhtu District Bawrhsap hi Company-a Manager, Nilesh Tiwari leh Resident Engineer, Ajit Chheti bakah Project Co-Ordinator leh thawktu dang ten lo dawngsawngin, formation cutting thawh mek ah hian June thla chhunga an target chu KM 5 a nih laiin khawchhia leh hrileng avangin tun thlengin KM 1 chauh an la zawh theih thu an lo hrilh a, nikhat-ah darkar 10 tal hnathawh theih an in beisei laiin a bik takin khaw chhia leh ruahtui tla tam avangin hnathawhna hun an neih tlem thu an lo hrilh bawk a ni.

Bawrhsap chuan Company hotute chu an harsatna tawhte a hriatthiam pui thu sawiin, theihtawp chhuaha chak zawk a hmala zel turin a chah a. National Highway laihzau hna thawh mekte mipuiten an zawh reng a ngaih tho avangin khualzin veivakte hmakhua ngai a, veivah nuam a kawngpui te buatsaih hram hram turin a hrilh bawk. Hei bakah hian Bawrhsap chuan hnathawktu ah khawtual mi a tam thei ang ber chhawr tura ngenin, an hnathawhna bul vela chengte nen inpawh tawn taka hna thawk ho turin a chah bawk a. Company hotute chuan tun dinhmun ah thawktu mi 260 awmin tual-chhung mi 100 vel company hian an chhawr thu DC hi an lo hrilh a ni. 

Bawrhsap hian Chhingchhip dai-a Kram Infracon Pvt. Ltd. in Testing Laboratory an bun te, Company inkulhna hmun Base Camp leh Hot Mix Plant an bun mek bakah Tuikum kama Crusher Plant an bun mek te a hmunah a tlawh bawk a ni.