Khunghran 33 la awm

Serchhip District-a hri leng avanga khunghran te chu hri lakah an him tih finfiah a nih hnuah chhuahtir zel niin nimin khan mi 33 chiah inkhunghrang an awm tawh.

Nimin khan Community Quarantine Centre (BCM Serchhip Hall)-a awm mi 6 bakah Quarantine Facility Centre-a awm mi 2 te chu chhuahtir an ni a, heti hian Quarantine Facility Centre-a awm mi 30 leh Dedicated Covid Health Centre (DCHC)-a awm mi 3 te chiah Serchhip District-ah inkhunghrang an awm tawh a, Kohhran leh Vantlang hmunhmaa inkhunghrang an awm tawhlo a ni.

Serchhip District chhunga inkhunghran kalpui mekah hian Vantlang leh Kohhran hmun-hma a inkhunghrang mi 164 an awm hman a, heng mite hi mipa 64 leh hmeichhia 100 niin Marian H/S-ah mi 43, Vocational Training Centre, P&E Veng-ah mi 28, Bethel Kohhran Hall-ah mi 33, S. Kawnpui Kohhran Hall-ah mi 42, BCM Ser-chhip Hall-ah mi 11 leh BCM New Serchhip Hall-ah mi 7 te an inkhunghrang a, heng atang hian hri kai hmuhchhuah awm lovin an Sample test result an hriat hnuah chhuahtir vek an ni ta a ni.