MP Fund atangin COVID-19 dona tur sum hlan

Mizoram Rajya Sabha MP, Ronald Sapa Tlau chuan COVID-19 dona atana a tul apianga hman turin nimin khan MP Fund atangin Chief Minister's Relief Fund-ah cheng nuai 5 a pe a, ramri venga YMA duty-te tanpuina atan Central YMA hnenah cheng nuai 5 a pe bawk.

Nimin a Rajya Sabha MP in COVID-19 dona atana Chief Minister hnena cheng nuai 5 a hlan hi amah (Ronald Sapa Tlau) hi a awmloh avangin a aiawhin MPCC General Secretary, Benjamin Thansanga'n Chief Minister, Zoramthanga hnenah a hlan a. Benjamin Thansanga chuan a hun a tawp tep tawh avanga duh anga tam pawisa pek tur a nei tawh lo chu Ronald Sapa Tlau chuan pawi a tih hle tih a sawi bawk.

Rajya Sabha MP-in ramri venga duty mek YMA Branch hrang hrangte tanpuina tura Central YMA hnena MP Fund cheng nuai 5 a pek hlanna hun pawh Central YMA Office-ah neih niin Central YMA President, Vanlalruata kutah a hlan a ni. Ronald Sapa Tlau hian Indian Medical Association (IMA), Mizoram Chapter hnenah COVID-19 dona atan MP Fund atangin cheng nuai 10 a lo pe tawh bawk a ni.