Latest News

Mau Chi Supply tura Tender chhuah sawifiah

Mizoram sawrkar-a Horticulture Department chuan thuchhuah siamin Mau Chi Supply tura Tender koh chungchang chu a sawifiah.
Nimin a thuchhuah an siamah Horticulture Department chuan Mau chu sawrkar Flagship Programmme a nih angin a bul tan nan Model Bamboo Plantation atan khaw pahnih - Hmunpui leh Lengpui thlan a ni tih tarlangin, a tirah mi 250 tan ruahman ni mahse thenkhat ten inbuatsaih nan hun tam zawk an mamawh avangin mi 226 thlan an ni tih an tarlang a. Mau ching tur thlan danah hian duhsak bik awm lovin, sawrkar ruahmanna anga phur tak leh taima taka ching thei turte thlan an nih thu te, Model anih angin Department in strict taka kalpuiin a hmunah kalin endik vek a nih thu leh tun dinhmunah tha taka hma la chu chhungkua 209 an ni tih tarlangin, an hmalakna chin ang zelin tanpuina pek an ni tih an tarlang.
Model Bamboo Plantation programme hi COVID-19 hripui len hma kum bul lam atanga lo kal pui tawh a ni tih pawh an thuchhuah ah chuan tarlangin, sum fai tanpuina pawh lo-vah nan te, mangkhawh nan te, Thlam sak nan te leh khur laih nan an hmalak dan ang zela pek a ni tawh tih an tarlang a. Mau chu phun hunbi nei anih avangin a phun hun a pelh chuan kum pumpui hlohna a nih avangin Hripui leng karah pawh Mau chingtuten kum an hloh lohna turin Mau phun tur ngaihtuah a ngai a. Mau ching turte hnenah Mau chi pek a nih theih nan Horticulture Department chuan Finance Department in ‘The Mizoram Public Procurement Rules, 2020 (Procurement of Goods, Works and Services)’ a siam angin Tender chu sawrkar phalna thlap a koh a ni tih an tarlang.
Horticulture Department thuchhuah chuan he Tender chhuah tur hi Director, Department of Information and Public Relations-ah dan ang thlapa thawn a niin, The Zozam Times, Vanglaini leh The Aizawl Post-ah te chhuah an nih thu leh Tender kohna copy hi Information and Communication Technologies Department-ah pek a nih thu leh Department website www.horticulture.mizoram.gov.in ah dah a ni tih an tarlang bawk.
Khawvelin hripui leng a buaipui laia kuthnathawktute leh Department-in intodelhna tura theihtawp a hma an la chu a lawmawm tih pawh tarlangin, Mizoram economy siamna atan pawh a pawimawh hle tih tarlangin, Hripui leng karah kan hma hun a hriat loh avangin Horticulture lama hmasawnna uar taka kum dang zawng aia nasa a kalpui a ngai tih hriain, Mau phun kawngah chauh ni lovin, mipuite hnena thlai chi leh tiak sem chungchangah pawh tan a la nasa hle tih an tarlang a. Model Bamboo Plantation atan hian SEDP leh National Bamboo Mission (NBM) pawisa converged niin, Mau chi leina tur pawh hi NBM, 2019-2020 sum atanga ruahman fel sa vek a nih avangin COVID-19 dona tura pawisa ruahman tihbuai a nei lo tih an tarlang bawk.

Comments

Popular News (Last 30 Days)