MLA Fund atanga ruahman Ambulance hlan

Thorang bialtu MLA, Zodintluanga chuan MLA Fund atanga ruahman, Ambulance (Maruti Eeco van) chu nimin khan Lunglei DC, V. Lalsangliana hnenah a hlan.

Lunglei DC Conference Hall-a Ambulance hlanna puala inkhawm neih ah Thorang bialtu MLA, Zodintluanga chuan kan hri do mek kan hneh theihna tur chuan Zoram mipui ten sawrkar thu leh thuchhuak bakah VLTF te thu kan zawm a ngai tih sawiin, “He hri do tur hian Sawrkarin theihtawp a chhuah mek zel a, Sawrkar hotuten Dan an duan hi kan zawma dikna leh rinawmna vawng chungin kan do hi hneh i tum ang u,” a ti bawk.

He hun kaihruaitu Lungei DC, V. Lalsangliana chuan Lunglei District mipui mamawh em em MLA-in a pe chu lawmawm a tih thu a sawi a. Hei bakah hian Southern Gas Agency, Lunglei chuan Lunglei-a Community Quarantine Centre 21-te hman tur Gas an pek theuh tur thu a sawi bawk. Thorang bialtu MLA, Zodintluanga hian Lunglei khaw chhunga Village Level Task Force pakua (9) hnenah leh Community Quarantine Centre-a duty-te hman tur PPE, Sanitizer litre 13, Disinfectant litres 65, Mask 900 leh Glove 450 a hlan bawk.