Hlawh hren sak tur sawifiahna tichhuak

Mizoram sawrkar-a Finance Department chuan sawrkar hnathawk te hlawh hren sak tura thuchhuah a siam chu sawifiahna a siam.

Hemi chungchanga Finance Department thuchhuah chuan sawrkar hnathawk te hlawh hren sak zat tur hi Gross Salary atanga chhut tur a nih thu leh hei hi Committee on Economy Measures in kil hrang hranga a ngaihtuah hnu leh Council of Ministers thukhawmin a pawm tak dan a nih thu tarlangin, he hlawh hrensak atang hian thla tin cheng vbc. 30 vel hum theih beisei a nih thu leh thla thum (June, July leh August) thla chhungin cheng vbc. 90 vel hum theih beisei a ni tih an tarlang a, a zat dik tak erawh chu Treasury tin te report atangin a la hriat theih chauh dawn tih an tarlang.

He Hlawh hrensak tur hian Mizoram sawrkar hnuaia sawrkar hnathawk zawng zawng te a huam vek dawn thu leh Grants-in-Aid hnuaia hlawh la leh Contract basis-a hnathawkte pawh an hlawh, Mizoram sawrkar tum sak ve an awm a nih chuan a huam tur thu tarlangin, Hlawh hrensak hian Gross Salary-a Rs. 40,000 leh a hnuailam la te chu a huam dawn lo tih an tarlang a. Rs. 40,000 aia tam hret lo la te pawh hlawh hrensak avangin Rs. 40,000 aia tlem an lak lohna turin ruahman a nih thu leh Group D tam ber te chu hlawh hrensak hian a huam dawn lo tih an tarlang a, Group C engemaw zat te pawh huam lo tur a nih thu leh Contract basis-a hnathawk tam ber te hi Rs. 40,000 hlawh tlinglo te an nih avangin a huam lotih an tarlang bawk.