Mizote chenna ram humhim nan hmalak zel tum

MZP chuan Mizote chenna ram humhim tlat anih theih nan a tul angin hma an la zel dawn tih an sawi.
Nimin-a thuchhuah an siamah MZP General Hqrs. chuan January ni 16, 2020-a Tripura Mizote chenna tibuailo tura inremna sawrkar laipui leh Mizoram leh Tripura state aiawhte leh Tuikuk aiawhten inremna thuthlung an siam chu lawmawm an tih thu sawiin, he inremna ngai pawimawh lova Mizote chenna, Jampui leh a chhehvel ah Tuikuk raltlante chenna tura ruahmanna siam a ni ta chu an duh lovin hriatthiam har an tih thu an sawi a. Zofate chenna ram humhim anih zel theihna tura Tripura Mizo Convention hmalakna chu an thlawp thu an sawi a ni.
MZP chuan Tripura sawrkarin Jampui Mizote ram ei hêk a, Mizoram atanga Tuikuk anmahni duhthu ngei a tlan thlate hmun thum (CCRF, Behliangchhip Mauza leh Paschim Hmunpui Mauza) a dah a tum chu tha an tihloh thu sawiin, Ram luahtu hmasa Mizote rawn lo leh a tir atanga thudik engmah hrilh an ni ngailo chu na an tihpui tih an sawi a. Heng hmunah hian a rual-a chhungkaw tam tak awmna turin hmun ruak a awm tawh lo nia sawiin, hun lo kal zel turah boruak tha tak a awm zel theih nan fimkhur taka ruahmanna siam turin MZP chuan thuneitute an ngen bawk.
MZP chuan Tripura sawrkar chu heng Tuikuk te tana hmun ralmuang zawk tur leh dinhmun tha an chan ve theih nan hmun dang tha zawk ngaihtuahna hmanpui thei se an duh thu pawh sawiin, tunah hian Tripura Sawrkar chuan hun harsa tak a tawng mek tih an hriatpui thu leh hemi chungchangah hian a tute mah rilru na lo leh dikna chanvo kan neihte in palzut sak anih loh nan fimkhur taka hma la turin an ngen bawk.

Comments

Chhiar Hlawhte