Latest News

Mizoram-a Zirtirtute sum thawhkhawm atangin H&FW Deptt. hnenah Ambulance 5 hlan a ni

Mizoram sawrkar hnuaia zirtirtu pawl hrang hrang inzawmkhawm, Mizoram Teachers Federation (MTF) chuan an hnuaia Zirtirtu pawl hrang hrang ten COVID-19 dona atana an sum thawhkhawm atanga an lei Ambulance 5 chu nimin khan Health & Family Welfare Department kutah an hlan.

Mizoram District hrang hrang 5 tana heng Ambulance hlanna puala inkhawm hi Mizoram Secretariat Building No-I kawt-ah nimin khan neih niin he hunah hian Health Minister, Dr. R. Lalthangliana chuan Mizoram Teachers Federation (MTF) in Ambulance panga (5) lai mai COVID-19 dona atana Mizoram sawrkar hnena an hlan chu thil lawmawm tak a ni, a ti a. District Hospital hrang hrang ten Ambulance an mamawh zia a taka hmutu a nih thu sawiin, tun dinhmunah motor lei a buaithlakin ngaihtuahna pawh sawrkarin a seng nasa a ni, a ti a. Chief Minister kaihhruaina hnuaiah theihtawp chhuahin ngaihtuahna sen a ni a, COVID-19 hian hrin chhuah a ngah em em a, a tira hriat lawk loh harsatna leh buaipui tur kan hmachhawn belh teuh teuh mai a, hetih laia School Education Minister leh a thawhpui zirtirtute thahnemngaihna a taka lo lang hi Mizoram tan chhinchhiahtlak thil ropui tak a ni, a ti. Health Minister chuan Swab Sample Test chungchangah kan khawl neih tharte duh hun huna hman mai theih a ni lova, sawrkar laipui duhdan zawm a ngaih avangin duh angin test chak theih a la ni rih lo tih sawiin, mipuite leh VLTF/LLTF ten phunnawi miahlo leh hriatthiamna nen an dawh thin avangin lawmthu a sawi bawk.
FMGST tia hriat thin, Mizoram Teachers Federation hi School Education Department hnuaia Teachers’ Service Association 10 inzawm-khawm a ní a. School Education Minister in COVID-19 dona kawnga thawhlawm an thawh tawh hnuah hma la leh tura a ngenna ngai pawi-mawh in Dedicated Ambulance hi Mizoram sawrkarin tun dinhmunah a mamawh ber niin an hria a, MTF a Affiliated Association kaltlangin Zirtirtuten cheng nuai 42 thawhkhawm lehin Ambulance -5 hi lei a ni a, heng Ambulance te hi CMO, Aizawl East, Zoram Medical College, Khawzawl District, Saitual District leh Champhai District tana ruahman a ni.
Heng Ambulance te hi Khawzawl District aiawhin Deputy Chief Minister, Tawnluia’n a dawng a, CMO, Aizawl East aiawhin Health Minister Dr. R. Lalthangliana, Saitual District aiawhin Minister, R. Lalzirliana, Champhai District aiawhin Dr. ZR Thiamsanga MLA leh ZMC aiawhin bialtu MLA Prof. F. Lalnun-mawia ten an dawng a ni.
Ambulance man atan hian Higher Secondary School Lecturers’ Association (HISS-LAM) in cheng nuai 6, Mizoram Secondary School Teachers’ Association (MISSTA) in cheng nuai 6, Middle School Teachers’ Association (MSTA) in cheng nuai 6, Mizoram Primary School Teachers’ Association (MPTA) in cheng nuai 6, Mizoram Grant-in-Aid High School Teachers’ Association (MIGAHTA) in cheng nuai 6, Mizoram High School Hindi Teachers’ Association (MHSHTA) in cheng nuai 3, Mizoram Middle School Hindi Teachers’ Association (MMSHTA) in cheng nuai 3, Mizoram Work Education Teachers’ Association (MWETA) in cheng nuai 2, Mizoram Adhoc Aided Middle School Teachers’ Association (MAAMSTA) in cheng nuai 2, Mizoram SSA Teachers’ Association (MSSTA) in cheng nuai 2 an thawh a. Ambulance leina atana sum an hman bang te chu Vawiin hian District hrang hranga DC te hnenah an hlan leh dawn a ni.
Hei bakah hian Mizoram Secondary School Teachers’ Association (MISSTA) chuan Vawiin hian an pawl sum-a an lei Ambulance thar pahnih chu Health & Family Welfare Department hnenah an hlan leh dawn bawk a ni.

Comments

Popular News (Last 30 Days)