COVID-19 hri kai mi 9 hmuh belh leh an ni

Nizan hmasa khan Mizoram-ah COVID-19 hri kai hmuhchhuah thar mi 9 awm lehin Mizoram-ah COVID-19 hri kai hmuhchhuah mi 130 an awm ta a ni.

Niminpiah khan ZMC Laboratory-ah Sample 615 enfiah leh niin heng zinga 499 hriat tawh ah COVID-19 hri kai mi 9 hmuhchhuah leh an ni a, heng mite hi mipa 3 leh hmeichhia 6 an ni a, tunhnaia Delhi atanga lo haw mi 4, Haryana atanga lo haw mi 4 leh Maharashtra atanga lo haw mi pakhat an ni a, Quarantine Facility a awm lai vek niin mi 8 hi sawrkar hmunhma a inkhunghrang leh midang pakhat hi Community Quarantine Facility-a awm an nih bakah COVID-19 symptoms neilo vek an ni.

Nimin-a COVID-19 positive hmuhchhuah tharte hi Siaha District leh Lawngtlai District atangin mi pali ve ve leh Lunglei District atangin mi pakhat an ni a, puitling kum 19 atanga 32 inkar bakah naupang kum 1 leh kum 10 mi an tel a ni.

Heti hian Mizoram-ah COVID-19 hri kai hmuhchhuah mi 130 awm tawhin an zinga pakhat chu enkawl dam a ni tawh a, tunah hian hri kai enkawllai mi 129 an awm mek bawk a ni.