Latest News

Mizoram CM in Bru dah tumna chungchang thlen

Chief Minister, Zoramthanga chuan Zampui tlangdung-a Bru dah tum chuan Quadripartite Agreement lo neih tawh in a thiltum leh inremna rilru (spirit) a kalh thu sawiin, helai hmuna Bru dahngheh tumna chu sut turin Tripura Chief Minister leh Union Home Minister chu a ngen.
Zirtawpni khan Mizoram Chief Minister, Zoramthanga chuan Union Home Minister, Amit Shah leh Tripura Chief Minister, Biplab Kumar Deb te chu lehkha thawnin, Mizoram atanga Tripura-a Bru raltlante dahnghehna atana Mizote chenna, Zampui Tlang leh a chhehvel ruahman tum chu kumin kumtir-a Quadripartite Agreement lo neih tawhin a thiltum leh inremna rilru (spirit) a kalh thu sawiin, helai hmuna Bru dahngheh tumna chu sut turin a hrilh a. January ni 16, 2020-a Home Ministry leh Mizoram leh Tripura sawrkar aiawhte leh Bru-Reang hnam aiawh ten New Delhi a inremna thuthlung an lo ziah tawhin a thiltum laimu chu, tuna Tripura sawrkar hmalakna hian a kalh thu Chief Minister hian a lehkha ah hian ziakin, hun rei tawh tak atanga Mizoram-ah leh Tripura-ah pawh Mizote leh Bru hnam inkara inhmuhthiamlohna lo awm fo tawh thin avangin tuna Tripur sawrkar ruahmanna hian boruak duhawmlo a hrinchhuah palh a hlauhawm thu lehkhaah hian a ziak a ni.
January ni 16, 2020-a Inremna chu a taka a hlawhtlin ngei theih nan Bru raltlante hi Tripura a Mizo chenna bial-a dah loh a tul thu Chief Minister, Zoramthanga chuan a lehkha ah hian ziakin, Tripura Chief Minister chu Zampui area ni lo, hmun remchang tha zawkah Bru raltlante awmnghehna tur ruahman ngei turin a ngen a. Kum 1998-a Mizoram atanga Tripura a Bru raltlante leh Tripura-a Mizote inkara boruak awm avangin Mizoten an sahchhuah, Sakhan Tlang-a Mizo khaw pali (4) lai chu an lo rauhsan tawh thu pawh tarlang a. Tripura Sawrkar ruahmanna siam chu ngaihtuah that ngai thil a nih thu leh tuna Bru awm nghehna tura an ruahman chu tihtawp a nih theih nan a tul anga inrawlh turin Union Home Minister chu a ngen bawk.
Zampui tlangdung-a Bru dah tumna hi Zirtawpni khan Tripura sawrkar aiawhte chuan a hmunah en tumin an thawkchhuak a, hei hi duh lovin helai hmuna awm Zohnahthlak te chu an pungkhawm a, hemi chungchang hi June 3-ah Tripura sawrkar aiawh, Mizo Community aiawh, Bru aiawh leh Kanchanpur-a NGO aiawh ten sawiho nise an ti a. Mizo Convention-a General Secretary, Dr. Zairemthiama Pachuau chuan Mizoram Chief Minister, Zoramthanga’n an harsatna hriaa Union Home Minister leh Tripura Chief Minister hnena Zampui Mizote thlavang hauhna leh an hnaivaia Bru dahngheh tuma rawtna awm mek sut vat tura huaisen taka a rawt chu Tripura Mizote tan a hluin a chungah an lawm hle a ni tih a sawi bawk.

Comments

Popular News (Last 30 Days)