Hri leng lakah inthlahdah loh a ngai - Health Minister

Health Minister, Dr. R. Lalthangliana chuan COVID-19 hrileng mek chuan engtik thleng nge min chamchilh dawn a hriat loh avangin inthlahdah loh a ngai a ni, a ti.
Inrinni khan SAD Conference Hall, Aizawl-ah Health Minister hovin Sawrkar hotulu te leh Doctor te chu thukhawmin COVID-19 dona kawnga Mizoram sawrkar hmalakna leh hmalak chhunzawm zel dan turte an sawiho a. He Meeting-ah hian Health Minister chuan hrileng avang hian a lo berah July thla tawp theng chu kan buai ala rinawm tih a sawi a, tha thlah lo leh inthlahdah lova awm a ngai a ni, a ti bawk.
He Meeting-a tel te hian khawvel pum bakah thenawm state Assam, Tripura leh Mani-pur-ah te Coronavirus kai an pun zel avangin Mizoram-ah pawh lockdown chhunzawm zel tha an ti a. Hri kai leh kai lo enna RAT chu tangkai viau mahse RT-PCR khawl hmanga test tam zawk tih a nih theih nan hmalak a tul thu leh ZMC-ah chauh he khawl hi a awm avangin, hmun kilkhawr zawka awmte tan rang zawka test tih theih nan khawl lei belh a tul thu te an sawi bawk.
Sawrkar hotute chuan ZMC bakah CO-VID-19 natna vei an awm pawhin an serious dan azirin anmahni enkawlna tur Dedicated Covid Health Centre chu Mizoram hmun hrang hrangah siam a nih thu an sawi a. RT-PCR tluka rintlak , hri vei leh vei lo enna Molbio Truenat khawl pahnih chu Lunglei-ah hman theih tura bun fel a nih tawh thu an sawi bawk.
He sawihona hunah hian Ambulance mamawhna a nasat thu pawh sawilan niin sawr-kar hotuten a tul angin an bawhzui dawn a. Quarantine Facility hrang hrangte hman dan pawh uluk zawka ngaihtuahna sen tula an hriat thu te an sawi bawk. Doctor rualte chuan COVID-19 laka invenna atan Mask vuah, Kut silfai leh Social distancing zawm a pawimawh ber tih an sawi nawn bawk.

Comments

Chhiar Hlawhte