Chief Minister in Lengte-a Piggery Vilage a tlawh

Lengte Piggery Village-a Vawk vulhna Farm hrang hrangte chu Inrinni khan Chief Minsiter, Zoramthanga chuan tlawhin an hmalakna te a hmunah a enpui a, “Covid-19 hian mahni a kan intodelh a tul zia a takin min zirtir a ni,” a ti.

Inrinni-a Lengte Piggery Village a tlawhna ah hian Chief Minister chuan AH& Veterinary Department Officer-te leh he Piggery Village-a Lengte leh Nghalchawm vawk vulhtute chu kawmin, Mizoram chu hmasawn tur chuan infrastructure lam bakah ei tur chaw, thlai leh sa a kan intodelh hmasak a pawimawh thu a sawi a. AH & Veterinary Department hnuaia hmalakna chuan mipuiin sa thianghlim an mamawh zat phuhruk mai bakah ran ei tur a intodelh, state pawn atanga lak belh ngai lovin a note pawh intodelh zelna tur a nih chhoh ngei a beisei thu a sawi a. Piggery Village chu midangte tana entawn tur a insiam chho tura a beisei thu sawiin, farm neitute chu theihtawp chhuah turin a chah a ni.

Chief Minister chuan COVID-19 avanga sawrkar hmalakna kal mek thenkhat chawlh lailawk rih ngai te a awm thu leh, kalphung thlak ngai te pawh a awm thu sawiin, chuti chung chuan sum neih sa chu a hlawk thei ang bera hmangin, ram a intodelh theihna turin thahnemngai taka thawh zui zel a tul thu a sawi a. Chaw, sa leh thlai-ah chuan kan ram leilung leh sik leh sa awm dan leh tui dawn thin zat ngaihtuah chuan intodelh ngei ngei thei kan nih thu a sawi bawk.

COVID-19 avang hian SEDP hnuaia ranvulh tihhmasawnna tura ruahmanna lo siam tawh chu siam danglamin, category thumah then a ni a, beneficiary tlem zawkin hmalakna lian tham zawka kalpui tum niin thahnemngai tak tak te hnenah puihna pe tura ruahman a ni.

Mimalin Vawk tlem te te leh darh sarh taka mahni mamawh a phuhru thei tawk chauha Vawk an vulh chu a hlawk loh avangin, rampum intodelhna atan leh mimal eizawnna tak tak a hman theih turin Vawk vulhna hmun bik (Cluster) siamin, Vawk vulh tak tak turte tanpuina tur scheme, IPEED project (Invention towards Pig productivity Enhancement through Entrepreneurship Development) siamin Piggery Village hi din a ni a. Kum 2018-19 atang khan cheng nuai 391 a hmalak tan a ni a. He project Cost-ah hian Beneficiary/entrepreneur thlanchhuahte hian 25% tumin State sawrkar in 75% a tumsak a ni. Lengte-Nghalchawm Cluster-ah hian beneficiary 5 thlan niin heng Farm-ah hian belhkhawmin vawk 850 chuang a awm mek a ni.