Sports Minister, Robert Romawia Royte chuan Inrinni khan Regional Sports Training Centre, Kolasib Saidan Field-a Sports Authority of India (SAI) Hostel siam tur a hmalak mekna a tlawh.
Sports Minister chuan RSTC Saidan-a SAI Hostel siam tum a hmalak a nih dan sawiin, Aizawl-a SAI Centre chu Mizoten Football tih loh a infiamna lama kan lan ve na zawng zawnga bul tumtu an ni tih sawiin, Kolasib-ah mi 100 awm theihna tur siam anih leh chuan Sports lamah nasa takin Mizote min chawisang thei turah an ngaih thu a sawi a. SAI Kolasib-ah hian tunah hian Football zir phalna neih a ni tawh tih pawh sawiin, hei bakah hian Sports Discipline pathum dang thlan phalna an hmuh leh tawh thu a sawi a, Discipline thlan tur pawh hi an tihfel thuai a rin thu a sawi bawk.
RSTC-ah hian Artificial Grass phah mek a ni a, Sports Minister chuan Artificial Grass an phah mek chu FIFA test paltlang thlap a nih thu sawiin, Mizoram-a FIFA test paltlang awmchhun a ni a, an phah zawh hnuah FIFA hian an rawn endik leh ang a, an duhthu a sam chuan Mizoram-ah FIFA Certified Turf hmasa ber a ni ang tih a sawi bawk.
Sports Minister hian Kolasib Hmar Veng-a Standard Futsal Ground, Standard Basketball Court leh Volleyball Court awmkhawmna hmun tura rawtna te an thlirho a, EAP Funding hnuaia khung luh tura DPR tha tak siam nise an ti a. Heng bakah hian Kawnpui-a Standard Basketball Court leh Standard Volleyball Court siam dan tur pawh enin Vairengte-a Sports Training Centre dinna hmun turte a enfiah a,Vairengte chu Serlui bial-a khawlian ber a nih avang leh khaw lum hmun a nih avangin Sorkarin Sports Training-na hmun tha ruahman a tum thu a sawi bawk.
Tourism Department changtu ni bawk Robert Romawia Royte hian Kolasib Tourist Lodge chu a hlui tawhin a him tawh lo tih pawh sawiin, a building hlui chu thiat vekin sakthat tum a nih thu a sawi a, Kawnpui tlangdung-ah riahna hmun tha a awm loh avangin Central Scheme tawp avanga Tourist Lodge sakzawh loh a awm reng chu thar thawh leh tum a nih thu te leh Serlui B tuikhuah behchhanin Water Sports Facilities changkang tak tak siam tum a nih thu te a sawi bawk.
Comments
Post a Comment