Mizoram-ah COVID-19 kai mi 12 hmuhchhuah belh niin ZMC-ah enkawl tura lak nghal an ni

Health Minister, Dr. R. Lalthangliana chuan nimin khan Aizawl-a Secretariat Conference Hall-ah thuthar thehdarhtute kawmin, Mizoram-ah COVID-19 hri kai mi 12 hmuhchhuah leh an nih thu a puang a, chung mite hriselna dinhmun chu a tha tih sawiin, COVID-19 natna vei ang pawhin an la awm lo (symptom a la lang lo) tih a sawi.

Health Minister Dr. R. Lalthangliana chuan June ni 1, 2020 khan Zoram Medical College (ZMC)-a COVID-19 Testing Laboratory-ah Swap Cample 116 endik a nih thu leh chung zinga mi 12 te chuan COVID-19 hri an kai tih hmuhchhuah a nih thu a sawi a, mi 12 zinga mi 10 te chu Delhi atanga Rel hmanga rawn haw an ni tih sawiin, mi 2 te chu Kolkata atanga lirthei hmanga rawn haw te an nih thu a sawi a. Hri kai hmuhchhuah thar zinga mi 11 te chu Kolasib District chhung ami, Quarantine Centre-a awm mek niin hri an kai tih hriatchhuah an nih hnuah ZMC-ah dahluh nghal an ni tih sawiin, an zinga mi pakhat chu Aizawl District chhung ami, ZMC-a enkawl mek a nih thu a sawi a, heng hri kai hmuhchhuah zinga mi 11 te chu hmeichhia niin midang pakhat hi mipa a ni a, kum 18 atanga 40 inkar an nih thu leh tun dinhmunah chuan an hriselna pawh thain, COVID-19 symptom a la lang lo tih a sawi bawk.
Health Minister chuan hri kai hmuh-chhuah thar te chu Mizoram chhunga cheng ni lovin rampawn atanga rawn haw te an nih bakah uluk taka khunghran an nih thu a sawi a, hei vang hian mipuite tan chi-ai chiam nachhan tur a awm lo tih a sawi a. Chutihrual erawh chuan fimkhur erawh a tul hle tih a sawi a, hri kai thar an awm vanga ralkhel lutuka dawr zawng zawng khar ngawt te chu thil tul ber a ni lo tih a sawi.
Hri leng a tai darh loh nana fimkhurna ngai lai ber chu ramri atanga rawn lutte an nih thu pawh sawiin Minister chuan, ramdang atanga Mizoram-a lo haw khunghran te chu inkhunhrannaa an awm dan tur hrilh hriat an nih thu leh sawrkar ruahmanna chu an zawm that a pawimawh hle tih a sawi a. Inkhunghranna hun bi, ni 14 zo tawh te pawh an In lama an haw hnuah pawh tawng-pawng in chiahpiah loh a tul thu a sawi bawk.

Comments

Chhiar Hlawhte