Chanchin thar thenkhat :

Goa atangin mi 734 rawn haw

Rampum-a inkharkhip kalpui a nih avanga Mizoram mi leh sa hruai haw mekah nimin khan Goa atanga hruai haw mi 734 te chuan Rel hmangin Bairabi an rawn thleng a, Kolasib DC leh SP bakah sawrkar mi pawimawh ten an lo dawng-sawng a ni. Tun tuma rawn haw te hi Aizawl District mi 426, Lunglei District mi 37, Serchhip District mi 50, Kolasib District mi 61, Champhai District mi 66, Siaha District mi 11, Mamit District mi 21, Lawngtlai District mi 24, Saitual District mi 16, Khawzawl District mi 14 leh Hnah-thial District mi 8 te an ni a, nimin vek khan an District theuh pantir nghal an ni. Tun tuma rawn haw te hian Bairabi-a tlawmngai pawl ten an lo buaipuina avanga lawmthu sawi nan pawisa an thawhkhawm a, an pawisa thawhkhawm Rs. 59,140/- chu Bairabi Rel chawlhhmuna tang-khang lo hawte buaipuitu tlawmngai pawl hrang hrang hnenah an hlan nghal bawk.

CM in Laptop hlan

Chief Minister, Zoramthanga chuan nimin khan a bial (Aizawl East-I) atanga kumin HSLC Exam-a Mizoram pum-a pathumna dinhmun luahtu, CR. Lalromawia, S/o C. Lallungmuana, Zemabawk 'N' hnenah lawmpuina thuziak leh Laptop a hlan a. Chief Minister chuan CR. Lal-romawia chu a hlawhtlinaah a lawmpui thu sawiin, a zir belh zelna tura theihtawp chhuah chhunzawm zel turin a chah a. A chhungte leh ram tana mi tangkai ni ngei tura a duhsak thu leh hlawhtlinna a dawn chhunzawm zel a beisei thu a sawi a ni. Chief Minister hian a hma lama an lo rel tawh angin nimin khan a hlawh Basic Pay atanga 60% (Rs. 48,000) chu COVID-19 dona atan CM Relief Fund-ah a chhunglut bawk.

Sawrkar in buhfai sem dawn

Supply Department chuan Atma Nirbhar Bharat hnuaiah COVID-19 avanga tangkhang leh Ration Card neilo te hnena a thlawnin mimal pakhat hnenah buhfai kg 5 zelin thla hnih chhung (May, June 2020) a sem dawn.

Mizoram telh thar a ni

Rampuma Ration Card ang khat hmanna tur Scheme, ‘One Nation One Ration Card’ Scheme ah State 3, Odisha, Sikkim leh Mizoram telh belh a ni. He thu hi Consumer Affairs Minister, Ram Vilas Paswan-a’n nimin khan puangin Integrated Management of Public Distributing System hnuaia Scheme-ah telh an ni a, he Scheme hnuaiah hian, Aadhar finfiah anih hnuah NFSA ration card neite chuan ramchhung khawi hmunah pawh e-PoS nena inthlunzawm Fair Price Shop atangin an card hmangin ration an la thei dawn a ni.

Lalduhoma’n sawrkar ngen

ZPM Legislature Party Leader, Lalduhoma chuan COVID-19 donaa a hmatawnga thawktu ten vanduaina an tawh palha tuamhlawmna tur sawr-kar in a siam chu lawmawm an tih thu sawiin, hei hian sawrkar hnathawk chauh a huam avangin Local/Village Level Task Force te huamtir ve tura ngenna Mizoram sawrkar hotute hnenah a thlen a. Hei bakah hian ICSE leh ISC exam a hun leh dawn ta tih pawh sawiin, Mizoram atanga Exam Centre hnai ber chu Agartala leh Shillong anih avang leh lockdown avanga pan a harsat avangin ICSE leh ISC Exam Centre hi Mizoram-a hawng ve mai turin sawrkar chu a ngen bawk.

BJP sawrkar hmalakna puang

Sawrkar laipui-a BJP in sawrkar an siam tum hnihna in kum khat a tlin denchhenin nimin khan BJP Mizoram Pradesh President, Van-lalhmuaka chuan Aizawl-ah BJP Office-ah thu-thar thehdarhtute kawmin kum khat chhunga sawrkar hmalakna hrang hrangte a tarlang a. Tunlai-a hri leng chungchangah Mizoram sawr-kar chu sum ringawt-ah buai lovin mihring nuai 11 bawr vel lek awmna State, mihring kaihhruai leh enkawl nuam bawk si, ram leilung tha leh ruahtui dawng ram hi ruahmanna mumal tak siam a, langtlang taka min kaihhruai thuai tura an duh thu a sawi bawk.