Mizoram-ah COVID-19 hri kai pakhat hmuh leh a ni

Pathianni khan Mizoram-ah COVID-19 hri kai mi pakhat hmuhchhuah leh niin Mizoram-ah hri kai hmuhchhuah mi 142 an awm tawh.

Sawrkar thuchhuah in a tarlan danin Pathianni khan ZMC Laboratory-ah Swab Sample 562 enfiah leh hri kai hmuhchhuah pakhat awmin midang 561 te chuan hri an kai lo tih finfiah a ni a, hri kai hmuhchhuah thar hi mipa kum 30 a upa, Siaha District a cheng, Delhi atanga lo haw, COVID-19 symptoms nei lo, Quarantine Facility a awm lai a ni.

Pathianni vek khan ZMC Laboratory-ah hian COVID-19 vei hmuhchhuah tawh te Swab Sample Test nawn leh niin Lunglei District atanga sample dawn 45 zingah 35, Mipa 21 leh hmeichhia 14 te chuan hri an kailo tih finfiah a ni bawk a, Khawzawl District atanga Sample dawn pahnih, hmeichhia ve ve zinga pakhat a negative bawk. Nimin khan ZMC-a damlo mi 3, Aizawl District mi 2 leh Mamit District mi pakhat te chu chhuahtir niin heti hian Mizoram pumah COVID-19 hri kai hmuhchhuah 142 awmin mi 12 enkawl dam an ni tawh a, mi 130 enkawl mek an ni.

Hri kai zinga zaa 55.77 enkawl dam an ni tawh

India rama COVID-19 kai hmuhchhuah la pung zelin hri kai hmuhchhuah atanga zaa 55.77 chu enkawl dam an ni tawh thung. Ministry of Health & Family Welfare chhinchhiahna atanga a lan danin India ramah nimin thleng khan hri kai hmuhchhuah hi mi 4,25,282 an tling tawh a, heng zingah hian mi 2,37,195 te chu enkawl dam ni tawhin hei hi za zela 55.77 niin hri kai enkawl mek 1,74,387 an awm thung a, hri kai enkawl mek aiin enkawl dam hi 62,808 in an tam zawk a ni. Hetihlai hian hri kai zingah nunna chan mi 13,699 an awm tawh bawk a, hei hi hri kai hmuh-chhuah zawng zawng atangin zaa 3.22 an tling a ni. ICMR chhinchhiah danin India rama sample test tawh zawng zawng zat chu 69,50,493 a ni.