COVID-19 dona kawnga sawrkar hmalakna sawifiah

Health Minister Dr. R. Lalthangliana chuan nimin khan SAD Conference Hall-ah thuthar thehdarhtute kawmin COVID-19 do kawnga Health Department hmalakna leh hnathawh chi hrang hrang a sawifiah.

He hunah hian Health Minister chuan COVID-19 hmachhawn tura Health department inbuatsaih dan sawifiahin, Sawrkar Laipuiin inralrinna dar a vuak veleh rang takin COVID-19 hmachhawn dan tur ngaihtuahin January ni 30 khan thutkhawm nghal a ni a, Lengpui Airport Screening leh ramri luhka zawng zawnga Screening Point din bakah State, District leh Village/Local Level Task Force din nghal rel niin rang takin bawhzui a ni a, February ni 6-ah Lengpui Airport Screening tih nghal niin India ramah Airport Screening ti hmasa ber kan ni tih a sawi a, Zokhawthar-ah February ni 3-ah Screening Point din niin February thla laihawl velah chuan ramri luhka zawng zawng deuhthaw ah Screening Point siam a ni, a ti. Lengpui Airport-ah Thermal Camera hmanga lo haw te endik an nih bakah RAT leh Throat Swab Cample lakna ruahman a nih thu te, India rama a titha ber pawl an nih thu a sawi bawk.

RT-PCR hmangin April ni 7 atang khan ZMC-ah Sample Test tih tan a nih thu pawh sawiin Health Minister, Pooled sampling method hmangin ni khata kan test zat pawh a tam sawt chho viau tih a sawi a. “Kar kalta khan Automated RNA Extractor leh PCR khawl rawn thleng tharte kan han bun fel chhung, ni hnih khat vel kan khaihlak zeuh tih loh chu ni khatah sample 600 chuang kan test ziah thei ta a ni,” a ti bawk.

Ambulance chungchang sawiin Minisrer chuan, sawrkarin 50 chuang a nei a, Mizoram hmun hrang hrangah darhsarh takin sem zai a ni a. Tangkhang rawn haw runpui lai khan Aizawl leh Lunglei mipui tam zualna District Hqrs. ah Ambulance indaihloh vangin harsatna kan nei lek lek tih a sawi a, Zirtirtu pawl intelkhawmin Ambulance pasarih lai sawrkar an pe chu lawmawm a tih thu leh Ambulance indaihlohna pawh engemawchen min chhawk zangkhai ang tih a sawi.

Health Department-in cheng nuai 132 Finance Department a an dil chungchang sawifiahin, “Kum dang aiin kumin khan Budget Session kan nei hma a. Finance Department-in Assembly-a budget pharh (February ni 19) a nih hmain budget bu siam te a ngaih avangin inhmakhawsuih an duh thin a ni,” a ti a. COVID-19 hripuiin India ram a rawn thlen tan tak avangin February ni 3 khan Finance Department-ah cheng nuai 132 dil a nih thu leh Finance Department lam hi Budget present tur hian inbuatsaih fel vek tawh avangin an pawisa dil hi in pek nghal ngaihna a awm lo tih a sawi a. Budget Session zawh hnu, Dan in a phal veleh sum hi pekchhuah nghal an nih thu a sawi bawk.