Mipuite tan chi-ai na tur a awmlo - DC Serchhip

Serchhip District-ah COVID-19 hri kai hmuhchhuah an awm avangin mipuite tan chi-ai na tur a awmloh thu Serchhip District Bawrhsap chuan a sawi.

Nimin chawhnu-a thuthar thehdarhtute a kawmna an Bawrhsap chuan State pawn atanga kan unau lo haw te hi fimkhur taka dawnsawn vek an nih avangin mipui tan chi-aina tur engmah a awm lo tih a sawi a. Chutihlaiin fimkhur lohna leh inthlahdahna avangin awlsam taka hri hi darh thei a nih thu sawiin, kan invenna tha ber chu thuawi a nih thu pawh a sawi a, mipuite chu lockdown chhunga thuawi taka inkhung tlat turin a chah bawk. Bawrhsap chuan thu belhchian dawl lo thehdarh kawnga fimkhur tura mipuite ngenin, mipui ti chi-ai thei thu diklo thehdarh chu Lung In tan theihna a ni tih hrereng turin a ngen a. COVID-19 vei te hming leh nihna thehdarh te, thawktute leh an chhungte awm tinuamlo leh tihnual thei lam te, lo thinhrikna ang chi te chu pawi sawina a ni a, Indian Penal Code hnuaia thubuai awrh theihna a ni tih a sawi lang bawk.

Zawhna chhangin Bawrhsap chuan Serchhip-a Nursing School chu COVID Care Centre atan buatsaih ni mah se sum senso ngai tam tham a nih dawn avangin Proposal siam a nih thu a sawi a, tuna COVID Care Centre, SIRD Hostel leh Hall te chuan min la dawl zo tura beisei a nih thu a sawi a. Hri mi 100 vel te chu Serchhip District-ah hian enkawl thei tura ruahman a nih thu te, PPE leh damdawi te pawh kan ngah tawk thu leh tunhnaia Chennai atanga rawn haw te pawh an Sample lak chhunzawm mek a nih thu te he hunah hian tarlan a ni bawk.