Chanchin thar thenkhat :

COVID-19 kai hmuh belh

Nimin leh niminpiah khan ZMC Laboratory-ah Mizoram District thenkhat atanga Sample lakkhawm te enfiah chhunzawm niin hriat theih chinah Sample 459 enfiah atangin COVID-19 kai mi 46 hmuhchhuah an ni a, heng zinga mi 43 hi Lunglei District niin Aizawl 2 leh Lawngtlai 1 an ni a, Mipa 31 leh Hmeichhia 15 niin a tam ber hi Symtom neilo an ni. Nimin a COVID-19 kai hmuhchhuah thar zingah hian Delhi atanga rawn haw tam berin mi 23 zet an ni a, Goa atanga rawn haw mi 6, Haryana 4, Bangalore 3, Punjab, Uttarakhand, West Bengal, Maharashtra leh Chattisgarh atanga rawn haw mi 2 theuh te an ni a, kum 18-33 inkar vek an ni a, an vai hian Quarantine Centre leh ZMC-a awm lai vek an ni bawk. Heti hian Mizoram-ah COVID-19 kai hmuhchhuah mi 88 awm tawhin mi 87 te chu enkawl mek a ni.

SBI in PPE Set an hlan

SBI Foundation chuan nimin khan Mizoram Sawrkar hnenah Personal Protective Equipment (PPE) Full Set 600 an hlan a, heng PPE Set hi SBI Foundation aiawhin SBI Regional Manager, LP. Lalchangkima chuan Health Minister, Dr. R. Lalthangliana kutah a hlan a ni. He hunah hian SBI Regional Manager chuan PPE hi SBI CSR ni lo SBI malsawmna dang, SBI Foundation kaltlanga pek a nih thu sawiin, CSR kaltlangin Mizoram in a mamawh tul dang ventilator leh thildang pekna tur cheng vbc. 1.3 hu pawh Head Office lamah thawn mek a nih thu a sawi bawk. Nimin a PPE Set an hlan hi Mask 2, Face Shield, Mit venna Goggles, Hand Gloves, suit leh a paihna tur(bag) te niin set khat hi Rs. 1990 man a ni a, a vaiin Rs.11,94,000/- hu a ni.

Ramri-a Duty boral

COVID-19 hri leng mek avanga Fungsih-chuah, Chhimtuipui Border-a Duty H. Lalven-mawii (18) D/o H. Kapliana Sangau-I chu a duty lai-a damlo-in Sangau PHC panpui a ni a, Malaria leh Thinlian niin nimin chhun dar 1:00 khan a boral a, Vawiin ah vuiliam a ni ang.

Hailan hlauh vangah ngai

MPC General Hqrs. a General Secretary, VL. Thazova chuan Total Lockdown chungchang thlirhona hun hmasa lama neih tawh thin ah Political Party aiawhte telh thin an nih thu sawiin, June 8, 2020-a Total Lockdown chungchang thlirhona Assembly Conference Hall-a pawl hrang hrang aiawhten an neih ah erawh Political Party aiawh an telloh thu a sawi a. Hei hi a chhan bera lang chu Ruling MNF Party in COVID-19 dona kawnga an thiltih fuhloh tam tak awm, hmaichhana inhailan khum an hlauh vang ni berah an ngaih thu a sawi bawk.

Khawl rawn thlen beisei

Health Minister, Dr. R. Lalthangliana chuan Mizoram sawrkar in COVID-19 test awlsamna tura khawl a chah, Automated RNA Extractor chuan nimin khan Lengpui a rawn thlen beisei a nih thu nimin khan a sawi a. He khawl hi Vawiin lamah Company Engineer in ZMC-ah install fel beisei niin sample atangin RNA hi automatic a la in rang takin RT-PCR test a tih theih dawn a. He khawl hian a hmaa Manual-a RNA Extraction tih chu a tul dawn loh vangin nitin sample 800 atanga 1000 vel test theih beisei a nih thu a sawi bawk.

Hri kai hmuhchhuah 2,66,598 tling tawh

India ramah nimin thlengin COVID-19 kai hmuhchhuah mi 2,66,598 tling tawh a, hri kai hmuhchhuah atanga zaa 48.46 te enkawl dam an ni tawh bawk. Ministry of Health & Family Welfare chhinchhiahna atanga a lan danin nimin thleng khan India ramah COVID-19 kai hmuhchhuah mi 2,66,598 awm tawhin heng zinga 1,29,214 te chu enkawl dam an ni tawh a, hei hi hri kai hmuhchhuah zawng zawng atanga chhutin 48.46 a ni a, he hri kai zingah nunna chan mi 7,466 awm tawh bawkin hei hi hri kai hmuhchhuah zawng zawng atanga chhutin zaa 2.80 a ni bawk. Tunah hian hri kai enkawllai miu 1,29,917 an awm mek a, darkar 24 chhungin sample test 1,41,682 a awm bawk a, ICMR chuan ram chhunga Laboratory 784 hnenah COVID-19 sample endik phalna a pe tawh a ni.