Mamit District-ah COVID-19 kai mi 5 hmuh belh a ni

Niminpiah (Pathianni) khan Zoram Medical College (ZMC)-ah COVID-19 kai mi 5 hmuh belh leh niin heng mite hi Mamit District mi vek niin hmeichhia vek an ni.

ZMC Laboratory-ah hian niminpiah khan Sample 682 enfiah niin heng atang hian hri kai hmuhchhuah mi 5 awmin heng mite hi tunhnaia Delhi atanga rawn haw te vek niin kum 21 leh 23 inkar vek an ni a, an vai hian natna langchhuak awmlo vek an ni. Heng mite hi West Phaileng Quarantine Centre-a awmlai vek nia thudawn niin Mamit-a COVID-19 kai te enkawlna tura ruahman, Covid Care Centre-ah lak nghal tura ruahman an ni.

Heti hian Mizoram-ah mi 3555 te Sample enfiah tawh atangin COVID-19 kai hmuh-chhuah mi 117 an awm ta a, heng zinga mi pakhat chu enkawl dam ni tawhin mi 116 te chu enkawl mek an ni a, District hrang hrang zingah Lunglei District-a hri kai hmuhchhuah la tam berin 45 an ni tawh a, Aizawl District-ah 28, Mamit District-ah 14, Kolasib District-ah 11, Champhai District-ah 5, Siaha District leh Lawngtlai District-ah 4 ve ve, Saitual District-ah 3, Khawzawl District-ah 2 leh Serchhip District-ah mi 1 hmuhchhuah an ni tawh a, Hnahthial District-ah hmuhchhuah an la awmlo thung a ni.

Hetihlai hian tunhnaia Aizawl Hospital & Research Centre pantu zingah COVID-19 kai an hmuhchhuah avanga he damdawi In-a thawktu mi 29 te Sample lak chu enfiah a nih hnuah hri kai an awm lova, hei vang hian nimin atang khan he damdawi In OPD, Emergency, Laboratory test leh Pharmacy te chu dan pang-ngai a kalpui leh nghal a ni a. Hei bakah hian he COVID-19 kai an hmuhchhuah chenna Veng, Mission Veng-a mi 34 te Swab Sample lak pawh enfiah nghal niin an negative vek nia thudawn a ni bawk.