Kum kalta chhunga a thlawna thisen pek tling tura AVBD target neih zat khum a ni

Association for Voluntary Blood Donation (AVBD) chuan kum 2019-2020 sawrkar kum-a a thlawna thisen pek tlin tura an bituk chu mi tlawmngaite avanga an tlin thu sawiin, lawmawm an tih thu an sawi.
World Blood Donor Day (June 14, 2020) puala thuchhuah an siamah AVBD General Hqrs. chuan kum 2019-2020 Financial Year chhung khan a thlawna thisen pek zat tling tura target an siam chu 90% a ni tih tarlangin, Mizo thalaite inpekna leh tlawmngaihna avangin he target hi tlinin, 90.90% lai Voluntary Donation a ni tih tarlangin, an lawm hle tih an tarlang a. Hei bakah hian tunhnai COVID-19 hripui leng vanga Mizoram-a inkharkhip a nih chhungin thisen pek a tlakhniam an hlauh thu leh, chuti chung chuan pawl hrang hrangte thahnemngaihna azarah April leh May thla chhung khan Voluntary Donation chu 95% lai a tling chho leh tih an tarlang bawk.
AVBD chhinchhiahna atanga a lan danin kum 2019-20 chhunga Mizoram-a thisen pek zawng zawng chu Unit 30,448 a ni a, hei hi kum khat chhunga thisen pek zat in sing thum a tlin vawikhatna a ni a. Thisen pek zawng zawng Unit 30,448 zinga Unit 27,676 chu Voluntary Donation niin hei hi 90.90% a tling a. A dang Unit 2,772 erawh chu Replacement Donation a ni thung. Kum tinin mimal-a thisen petu (regular blood donor) an pung zel pawh lawmawm an tih thu leh April 2019 - March 2020 chhungin Individual donor-te'n an pek zat chu unit 7,433 a nih thu an tarlang bawk.
AVBD thuchhuah chuan AVBD chu May 10, 1991-ah Aizawl-ah din a nih thu leh tunah hian Aizawl-ah a hmunpui awmin, District Headquarters hrang hrangah Branch neiin District thar pathum - Saitual, Khawzawl leh Hnahthial-ah te erawh chuan Branch an la nei rihlo tih an tarlang a. Mizoram sawrkar leh Blood Bank hrang hrangte nen thawkhoin, Mizoram mipui thisen pek nachang an hriat theih nan te, thisen pek pawimawhzia an hriat theih nan te, a thlawna thisen pek (voluntary blood donation) a san zel theih nan te leh thisen pek kaihhnawih thil chi hrang hrangah theihpatawpin tan an la ve thin tih pawh tarlangin, tlawmngai tak leh thahnemngai taka mi dangte tana malsawmna nih tum tlat chunga nunna chhan tura thisen petute zawng zawng chungah lawmthu an sawi tih an tarlang bawk.

Comments

Chhiar Hlawhte