Lunglei-ah RT-PCR Laboratory dah thuai duh

Health Minister Dr. R. Lalthangliana chuan Lunglei a RT-PCR Diagnostic Laboratory din vat chu Sawrkar duh dan a nih thu a sawi.

Lunglei Civil Hospital-a RT-PCR Diagnostic Laboratory din theih nana hemi chungchang zirchiang tura Sawrkarin a tirh mithiam pathum telna Expert Team chuan nimin khan Health Minister, Dr. R. Lalthangliana hnenah hian an thil hmuh dan leh an rawtna te an thehlut a, he hunah hian Health Minister chuan rang taka Expert Team in an thil hmuh dan te an thehlut chu lawmawm a tih thu sawiin, lawmthu a hrilh a. Lunglei a RT-PCR Diagnostic Laboratory din vat chu Sawrkar duh dan a ni tih sawiin, amaherawh chu a behbawm leh a ken tel thildang dang bakah ICMR phalna te a ngaih avangin pawngpaw hmanhmawh ngawt theih a ni lo tih a sawi bawk.

He hunah hian Expert Team a tel mithiam pahnih - Dr. H. Lalhlenmawia, HoD, Department of Pharmacy, RIPANS leh Dr. Vanramliana, Asst. Professor, Zoology, PUC te chuan an thil hmuh dan tlangpui sawiin, Laboratory din nan RT-PCR khawl neih mai a tawk lova, a behbawm khawl dangte leh mamawh hrang hrang te bakah ICMR atanga phalna te a ngaih avangin Laboratory din nan tlemin hun a duh rei deuh tur thu an tarlang bawk. Expert Team-in an thil hmuh dan tlangpui an sawinaah I&PR Minister leh Social Welfare Minister bakah COVID-19 Medical Operational Team Chairman leh Chief Secretary bakah sawrkar mi pawimawh te an tel bawk a ni.