Lirnghing in Mizoram khawchhak lam a sawi leh; Mi tam tak hlauhtawng in an awm mek

Nizan hmasa leh nimin zing thleng khan Mizoram khawchhak lamah lir ala nghing chhun-zawm zel a, Geological Survey of India mithiam te chuan hei hi tunkar Thawhtanni zinga 5.8 magnitude-a na lir nghing hnukhawi zel nia an hriat thu an sawi.
Nizan hmasa dar 11:00 vel khan Champhai atanga chhimlam KM 70 vela hla ah 3.2 magnitude-a na in lir hi a nghing leh a. Hemi avang hian Khawbung lama mi thenkhat te chu pawn-ah chhuakin an thlabar hle a, hemi hnu nimin zing dar 8:02 khan Champhai atanga chhim thlang lam KM 31 velah lir hi a nghing leh a, Mizoram hmun hrang hrangah lirnging hi hriat theih niin chhiatna thleng erawh a awm thu hriat a ni lo thung. Geological Survey of India mithiam te chuan heng lirnghingte hi June ni 22, 2020 zing-a 5.8 magnitude-a na lir nging chhunzawmna nia an ngaih thu leh ni 10 chhung vel chu nghin chhunzawm thei dinhmunah a ding niin an sawi bawk a. June 22, 2020 zing dar 4:10-a Tuipuiral-a lir a nghin atanga he chanchin buatsaih lai thleng hian lirnghing hnukhawi vawi 15 zet mihring in an hriat theih chin chhinchhiah a ni tawh a ni.
East Tuipui Bialtu MLA leh Bamboo Link Road Board Vice Chairman ni bawk, Ramthan-mawia chuan niminpiah khan lirnghing avanga Khawbung-a chhiatna thleng te a hmuna a enfiah hnuah nimin zing khan Thasiama Se no neihna tlawhin lirnghing in a sawi avanga a dinhmun te a en a, East Tuipui bialtu MLA chuan Lirnghing in Thasiama Se no neihna tlang pang lung tla leh a bul hna lei khi chu a chet leh chuan Chawngtui khaw panna kawng tiping mai thei a nih avangin Vaphai ep lama Chawngtui panna kawng chu tihtlang dan ngaihtuah a ngai tih a sawi bawk. Nimin vek khan bialtu MLA hian Lirnghing avanga chhiat tawhna, Khuangleng pawh tlawhin an dinhmun a enfiah a, chhiatna tawk te chu a tawrhpui thu hrilhin mithiam te thurawn ngai pawimawh chunga fimkhur taka awm turin a hrilh bawk.
Tunkar Thawhtanni-a lirnghing khan Champhai District chhunga khaw hrang hrang- Zokhawthar, Khawbung, Khuangthing, Vaphai, Sesih leh Samthang te bakah Tuichangral tlangdung-ah pawh thil a tichhe nual a, heng lirnghinna hmun te hi MZU Study Team, Seismologist Dr. Saitluanga (HoD, Geologist, PUC) hovin, Dr. V. Vanthangliana (PUC), Dr. J. Malsawma (MZU) leh Dr. Paul Lalnuntluanga (MZU) te chuan zirchiangin khawchhak tlangdung hi an pan nghal a, nimin khan MZU-a lirnghing lam thiam te pawhin Khawbung hi thlengin Mizoram sawrkar mi pawimawh te pawhin Tuipuiral hi an thleng tawh a, nimin lam kha chuan lirnghing thawm hi a awm zui ta vak rihlo nia thudawn a ni bawk.

Comments

Chhiar Hlawhte