June 30, 2020 thlengin Mizoram pumah inkharkhipna kalpui leh a ni dawn

COVID-19 avanga rampum-a inkharkhip kalpui mek chu nizan khan a thawh li-na a tawp ta a. Sawrkar chuan a thawh ngana atan Vawiin atanga ni 30 (June 30, 2020 thleng) inkharkhip kalpui leh tura ruahmanin hemi atana inkaihhruaina pawh nimin vek khan tihchhuah nghal a ni bawk.

Hemi chungchanga nimin-a Mizoram Chief Secretary leh State Disaster Management Authority-a State Executive Committee Chairman ni bawk, Lalnunmawia Chuaongo in thuchhuah a siamah a tarlan danin COVID-19 avanga March 25, 2020 atanga inkharkhip kalpui tawh chu ramchhung bakah thenawm State-ah hri kai an pun zel avang leh hri hluarna hmun atanga rawn haw tam tak an la awm avangin he hri leng laka mipuite kan him theih nan June 30, 2020 thleng inkharkhipna hi Mizoram-ah kalpui leh tur a nih thu a tarlang a. Hemi atana inkaihhruaina tur a tihchhuah ah a hmaa Lockdown kalpui dan nen danglam lutuk awm lovin International border leh Inter-State border khar mekte chu khar chhunzawm an ni anga. Bairabi, Vairengte leh Kanhmun kaltlang kawngpuite erawh chu Essential Commodities bakah Home Department-in a phal bungraw dang phur lirtheite tan hawn a ni anga. Mipui zin veivahna lirthei erawh chu Home Department phalna neite tan lo chuan khap tlat a ni thung.
Mizoram Sawrkar phalna nei lo Mizoram-a 1uh khap tlat niin phalna neia Mizoram-a lo lut reng reng chu Entry Point-ah uluk taka Screening kalpui chhunzawm zel a ni anga. COVID-19 Lockdown avanga Mizoram mi leh sa, Mizoram pawn-a tangkhangte lo haw dan tur chu kaihhruaina siamthat (Revised Standard Operating Procedure)-in a sawi angin kalpui a ni anga. Mizoram-a rawn lut reng reng chu ni 14 chhung khunghran tur an ni ang.
Dawr, sumdawnna hmun leh eizawnna kawnga hmalakna te chu 'Standard Operating Procedure (SOP) for Social Distancing' anga kalpui theih zel a ni anga, dawr leh sumdawnna hmun te chu a hma ang bawkin a hawn dan kalphung pangngaiin hawn leh a ni anga. Mipuiin awlsam zawka thlai leh chawhmeh an hmuh theih nan Veng hrang hrangah LLTF/VLTF ten chawhmeh zawrhna tur hmun an ruahman anga, metre hnih (2) aia inhnaih lo turin thutna an ruahmansak ang. Inrinni-a mipui punkhawm luih luih pumpelh nan kar khatah ni thum (3) tal thlai thar leh chawhmeh dang zawrhna hun ruahman thin tur a ni a. Bazarpui chu khar chhunzawm rih a ni anga. Tuallai leh kawtthler-a thlai, chawhmeh leh thildang zawrh (street vending) khap tlat niin dawr te chu tlai dar 5:00-ah khar leh tur a ni ang.
Zirna In, Training Institute leh Sakhaw biakna hmunte chu khar chhunzawm zel tur niin hei hian Administrative Office hna pangngai kalpui erawh a huam lo thung a, mipui punkhawmna hrang hrangte pawh huaihawt phal la ni lovin Inneih inkhawm leh mitthi vuina-ah mi 20 aia tam pun-khawm khap ala ni bawk.
Lirthei tlan chungchangah kalphung thlak danglam lutuk awm lovin Lockdown kalpui chhung hian mi panga (5) aia tam punkhawm khap chhunzawm a ni a, tul bik thil-ah lo chuan mahni In leh Compound chhuahsan khap chhun-zawm a nih bakah zan dar 7:30 leh zing dar 4:30 inkarah pawnchhuah khap a ni dawn a. A hma ang bawkin hei hian phalna bik pek te a huam lo leh anga, kum 65 chunglam bakah taksa hriselna lama harsatna nei sa te, nau pai te leh naupang kum 10 hnuailam te chu mahni Inchhungah inkharkhip tur niin pawn-a chhuak turte chuan hmai tuam chhunzawm a ngai dawn a. Vantlang hmun leh dawra kalte chu metre hnih (2) tala inhlata awm tur a ni bawk.
He thupek zawmlo chu Disaster Management Act, 2005, Section 51 atanga Section 60, The Mizoram (Containment & Prevention of COVID-l9) Ordinance, 2020 Section 5 leh IPC Section 188 hmangin hrem theih an ni ang.

Comments

Chhiar Hlawhte