Inkharkhip chhunga Pisa kai dan tur ruahman

Sawrkar Pisa hrang hranga thawktute Pisa kai dan tur chu Inkhar-khip kaihhruaina hnuaiah siam thar a ni.
Nimin atanga inkharkhip kalpui takah Group A Officer, Aizawl leh District Hqrs. danga thawk te chu dan pangngaiin Office kal tur niin Group B chu a zatve (50%) zelin an inkal-chhawk anga, Group C leh D Staff te erawh chu hmun thuma thena hmun khat zelin an inkalchhawk ang. Secretary, Head of Department emaw Head of Office ten inkalchhawk dan tur hi an ruahman anga. A tul dan azirin Group B, C leh D te chu hei aia tam pawh kal turin a ruahman theih ang.
Heng bakah hian Constitutional Body te leh Mizoram sawrkar hnuaia Board, Corporation leh Statutory Body te pawh hetiang hian kal tur niin Health Department-a thawktu te, Home Department leh a hnuaia thawktu Police, Home Guards, Civil Defence, Fire & Emergency Services, Prisons te, Disaster Management, Civil Aviation, Excise & Narcotics, Municipal Services, Forest Field Works, PWD/PHE/P&E Department-a Technical Staff te leh, Aizawl khawpui leh District Hqrs. nilo hmun danga Sawrkar Office te chu a pangngaiin (full strength-in) an kal ang. 
Sawrkar hnathawk hrisel lohna ben-vawn nei leh naupaite chu Head of Office ten Medical Certificate ngai lovin Commuted Leave an pe thei anga. Tul bikah lo chuan Meeting neih loh tur niin inrawn leh sawiho ngai thil-ah chuan Video Conferencing leh Online Mode dangte hman tangkai hram tur a ni a. Meeting turin District-a Officer te Aizawl-ah koh loh tur niin mipuiin Sawrkar Department te ralkhat atanga an dawr theihna’n Department tinin Information Technology an hmang tangkai tur a ni a. Hemi atan hian a tul angin ICT Department-in hma a la ang.

Comments

Chhiar Hlawhte