Hun reilote ah COVID-19 kai damchhuak chanchin hriat theih beisei a ni

Health Minister, Dr. R. Lalthangliana chuan ni reilote ah COVID-19 kai damchhuakte chanchin thu lawmawm kan hriat chhoh tan hmel tih a sawi.
Health Minister hian nimin khan a Pisa-ah Mizoram COVID-19 dinhmun sawifiahin, COVID-19 vei kan pun belh zel a rinawm rualin a vei sa te chu thalai taksa chak lai an ni tih sawiin, dinhmun thalo leh ngaihtuahawm an awm lova, ni reilote ah hian a damchhuakte chanchin thu lawmawm kan hriat chhoh tan hmel a ni, a ti a. COVID-19 in kan nunphung thla thum vel a tibuai ta tih sawiin, mipuite tan pawh a hrehawmin a beidawnthlak viau ang tih a hriat tih a sawi a. Chutih rual chuan hemi kaihhnawiha tha leh zung phunnawi miah lova sengtu zawng zawngte fakawm a tih thu sawiin, “Sawrkar hnathawk, tlawmngai pawlte, VLTF leh LLTF bakah a bik takin tunhnaia District hrang hranga Swab Sample latu Lab. Technician-te leh a test tu ZMC Laboratory a chhun zan zawma riahchilh a thawktute an hah in an rim hle a, an chungah lawmthu ka sawi rualin an hriselna leh an taksa damna atan kan tawngtaipui reng a tul a ni,” a ti.
Health Minister chuan thawktu indaihloh karah mi tlawmngai, mi fel tak tak an lo penchhuak chu lawmawm a tih thu pawh a sawi a, tangkhang lo haw mek leh lo haw tur an la awm thu sawiin, anni hi India ram chhung leh pawn atangin hun harsa tak paltlangin mahni Inpui thlahlelin an lo haw dawn a, an rilru tina lo ila, tha takin ilo lawm ang u, tiin tangkhang lo haw te phurtu Bus leh Sumo driver te an fakawm a tih thu leh an huaisenna leh an inpekna hlu a tih thu a sawi bawk.
COVID-19 dona kawnga ramri leh hmun hrang hranga fehchhuak zingah damlohna in a tlakbuak leh nunna hial chan phah te an awm tih a hriatin a pawi a tih thu pawh Minister chuan a sawi bakah, Quarantine hun chhung ni 14 ni tawh lovin ni 21 a nih tawh zawk thu sawiin, Quarantine Facility a awm mekte thuawihna chu fakawm a tih thu leh mipuite thuawihna a lawmawm tih sawiin, midangte tana dawnsawn nuamlo leh rilru tina thei thil sawi chhuak lo tur leh, Social Media-ah thu belhchian dawllo leh dik ziktluak lo thehdarh lo hram hram turin mipuite a chah a. Tun dinhmunah Community Spread a la awm rihlo ni a hriat a nih thu leh sawrkar pawh theihtawpa a fimkhur thu a sawi bawk.

Comments

Chhiar Hlawhte