Serchhip Bawrhsap in sawifiah

Serchhip District Bawrhsap chuan thuchhuah siamin Lockdown kalpui mekah mihring veivah phalna chu tul bik thil-ah Village Level Task Force (VLTF) ten phalna an pe thei tih a sawi.

Hemi chungchanga nimin a thuchhuah a siamah Ser-chhip District Bawrhsap leh District Level Task Force on COVID-19 Chairman, Dr. Lalzirmawia Chhangte chuan Serchhip Town leh Thenzawl-a COVID-19 dona Total Lockdown kalpui mekah mihring veivah phalna chu tul bik thil ah VLTF ten chetvel phalna hi an pe thei tih a tarlang a. Lirthei chhuak tur reng reng - feh tur, dawra kal tur, Petrol la tur, Office dawr tur leh a dangte'n mCOVID-19 mobile application-ah mPASS hmangin dilna an thehlut ang tih a tarlang bawk.

Bawrhsap thuchhuah chuan In sakna bungrua zawrhna dawr te hawn phal a ni lo tih pawh tarlangin, VLTF ten phalna an pek In sa tur ten mahni bungraw neihsa hmangin hna an thawk tur a nih thu a tarlang a. In sa tur hian mi panga (5) aia tam chhawr phal a nih loh thu tarlangin, hnathawhna hmun ah Social Distancing zawm tum hram tur a ni tih a tarlang a. Retailer-a buhfai leh Khawnvartui la turte pawhin VLTF phalna permit an nei vek tur a ni tih tarlangin, heng te hi an sem laiin VLTF ten an vil tur a ni tih pawh a tarlang bawk.

Heng bakah hian nitin mamawh thil phur ni lo motor dang, Serchhip khawpui leh Then-zawl atanga lut leh chhuak turte chuan mCOVID-19 App hmangin phalna an la hmasa ngei ngei tur a ni tih pawh Bawrhsap thuchhuah chuan a tarlang a,Mizoram Sawrkar Order angin Ser-chhip khawchhung atanga feh turte chuan zing dar 4:30 AM atanga zing dar 7:00 inkarah khawchhung an chhuahsan fel hman tur a ni tih pawh tarlangin, tlai dar 5:00 atanga zan dar 7:30 inkarah an haw thleng fel hman tur a ni tih a tarlang bawk.