Hri kai enkawl dam pung zel

Niminpiah khan ZMC Laboratory-ah Sample 804 enfiah niin heng zinga result hriat tawh 583 zingah COVID-19 hri kai hmuhchhuah an awm lova, Sample 221 result nghah mek a ni.

Sawrkar thuchhuah tarlan danin niminpiah-a ZMC Laboratory-a Sample 804 enfiah te hi Aizawl, Lunglei, Siaha, Mamit leh ZMC-a damlo enkawl mek te an ni a, heng zingah hian hri kai hmuhchuah awm lovin Sample enfiah zingah hian Lunglei-a COVID-19 damlo enkawl mek 2 sample ennawn pawh telin pakhat hian hri a kai tawhlo tih finfiah a ni a, pakhat zawk hi nghah mek a ni thung.

Hetihlai hian niminpiah khan ZMC-a COVID-19 kai damlo enkawl zinga mi 3, Aizawl District mi 2 leh Mamit District mi pakhat te chu hri an kai tawhlo tih finfiah a nih hnuah chhuahtir niin nimin khan midang 7, Aizawl District mi 5 leh Saitual leh Kolasib District mi pakhat ve ve te pawh damin chhuahtir an ni ve leh bawk a, heti hian nimin thleng khan COVID-19 kai damlo zingah mi 19 te chu dam-a chhuahtir ni tawhin hri kai enkawllai 123 an awm mek a, hei bakah hian hri kai tawhlo, an dinhmun enthlak mek avanga damdawi In la chhuahsan theilo pawh engemaw zat an awm mek bawk a ni.

Hri kai leh enkawl dam pung

Nimin thleng khan India ramah COVID-19 hri kai hmuhchhuah 4,40,215 an tling tawh. Ministry of Health and Family Welfare in a chhin-chhiahna atanga a lan danin India ramah hian hri kai hmuhchhhuah mi 4,40,215 tling tawhin heng zingah hian mi 2,48,189 te chu enkawl dam ni tawhin hei hi hri kai atanga chhutin zaa 56.37 a ni a, tunah hian hri kai enkawllai 1,78,014 te chu enkawl mek an ni thung. Hetihlai hian hri kai zingah nunna chan mi 14,011 awm tawh bawk a, hri kai atanga chhutin nunna chan tawh hi zaa 3.18 an ni bawk. Tun thlengin rampum ah Sample 71,37,716 enfiah a ni tawh a ni.