Hri kai 2 hmuh belh leh; mi 47 enkawl dam tawh

Niminpiah-a ZMC Laboratory-a Swab Sample enfiah zingah COVID-19 hri kai hmuhchhuah mi 2 awm lehin nimin tlai thleng khan hri kai zinga 47 te chu enkawl dam an ni tawh thung.

Niminpiah khan ZMC Laboratory-ah Swab Sample 1113 enfiah leh niin heng atang hian hri kai hmuh-chhuah pahnih awmin 1052 te erawh chuan hri an kai lo tih finfiah a ni a, Sample 59 erawh he thu buatsaih lai hian result hriat hman a ni lo thung a, heti hian ZMC-a Sample enfiah tura thawn khawl te chu enfiah zawh a ni ta bawk a ni.

Niminpiah-a ZMC Laboratory atanga hri kai hmuhchhuah pahnih te hi Aizawl District mi ve ve niin hmeichhia ve ve - naupang kum 3 a upa leh puitling kum 23 a upa, Maharashtra atanga lo haw an ni a, an pahnih hian Quarantine lai mek niin COVID-19 symptoms an nei rihlo a ni. Niminpiah-a Sample enfiah te hi Aizawl, Lunglei, Champhai, Kolasib, Serchhip, Mamit, Khaw-zawl leh Saitual bakah West Bengal mi, Mizo-ram-a Quarantine lai te an ni a, ZMC-ah enkawl tura lak nghal niin ngaihtuahawm an nilo tih dam-dawi In thuneitute chuan an sawi bawk.

Hetihlai hian Mizoram-a COVID-19 hri kai hmuhchhuah enkawl zingah enkawl dam leh damdawi In chhuahsan pawh an pung ve zel a, nimin khan Lawngtlai District-a hri kai enkawl mi 8 te chu chhuahtir niin ZMC-a enkawl mi 9 te pawh chhuahtir an ni a, heng te hi Aizawl District mi 6, Saitual District mi 2 leh Serchhip District mi pakhat an ni. Heti hian nimin tlai thleng khan Mizoram-ah COVID-19 hri kai hmuh-chhuah mi 147 awm tawhin heng zinga mi 47 te chu enkawl dam niin damdawi In atanga chhuah-tir an ni tawh a, mi 100 enkawl mek an ni a. Hri kai hmuhchhuah la awmlohna District, Hnahthial bakah Saitual leh Lawngtlai District-ah te chuan hri kai an awm tawhlo a ni.

India-a hri kai hmuhchhuah nuai 5 tling dawn hnai

India rama COVID-19 hri kai hmuhchhuah chu mi nuai 5 an tling dawn hnai ta a, hetihlai hian hri kai zinga enkawl dam pawh a ni telin an pung ve zel. Ministry of Health & Family Welfare chhinchhiahna atanga a lan danin darkar 24 kalta chhung khan India ramah mi 2,15,446 te Sample enfiah atangin COVID-19 hri kai hmuhchhuah thar 17,796 awmin hei hi nikhat-a hri kai hmuhchhuah tam ber tum a ni leh a, heng mite nen hian hri kai hmuhchhuah hi mi 4,90,401 an tling tawh a, heng zingah hian mi 2,85,636 te chu enkawl dam ni tawhin hei hi za zela 58.24 niin hri kai enkawl mek 1,89,463 an awm thung a, hri kai enkawl mek aiin enkawl dam hi 96,173 in an tam zawk a ni.

Hetihlai hian hri kai zingah nunna chan mi 15,301 an awm tawh bawk a, hei hi hri kai hmuhchhuah zawng zawng atangin zaa 3.12 an tling bawk a ni.