Hmuntha khua in khunghran te chawhmeh an pe

Serchhip District chhunga Quarantine Centre hrang hranga khunghran te tan Hmuntha khua chuan nimin khan chawhmeh leh an mamawh tur thil chi hrang hrang an rawn hlan.

Nimin khan Hmuntha khaw VCP, C. Malsawmdawngkima chuan Village Council te huaihawta an khaw mipuite thawhkhawm thlai thar chi hrang tam tak, Thingfak leh pawisafai Rs. 500 chu Serchhip District chhunga khunghran mekte tan Serchhip Bawrhsap Dr. Lalzirmawia Chhangte, IAS kutah a hlan a. He thilpek hlanna hun tawi hi DC Office tual-ah buatsaih niin Bawrhsap Dr. Lalzirmawia Chhangte chuan, kan unau phai atanga rawn haw te chu zo chawhmeh rei tak hmu tawhlo te an ni hlawm a. Chuvang chuan Mizo chawhmeh hi an tan a hlu bik hle ang tih a rin theih a, a tharlam bawk si a, a lawmawm hle a ni, a ti a. Hetianga sawrkar tanpuia, kan unaute duhsakna thinlung neia Hmuntha khuate te an rawn penchhuak chu lawmawm a tih thu sawiin, khaw mipuite chungah lawmthu a sawi bawk.

He hunah hian Hmuntha VCP, C. Malsawmdawngkima chuan an thil rawn hlan te report a pe a, Antam, Phuihnam, Maian, Zikhlum chang chawr, Sawhthing, Hmarcha ro leh hring, Buhfai kg 50, Zopurun, Chingit, Bawkbawn, Sawhthing mothar, Hmarchapui, Japan Zawngtah, Thingfak 207 Truck trip khat leh pawisafai Rs. 500 te a ni a. A hlan tur hian VCP leh VC member, K. Lalrinpuii leh midang pasarih an rawn kal a. Truck in an rawn phur a ni. Nimin a heng thlai thar rawn pek te hi nimin vek khan Quarantine Centre hrang hrangah semdarh nghal a ni.