VC ramri tihtet tumna duhlo

Serchhip-III Village Council huamchhunga tlawmngai pawl leh Political Party hrang hrangte chuan Serchhip-a Village Council thar siam turah an Area lakthen tum chu an duhloh thu an sawi.

Mizoram sawrkar chuan kumin a Village Council inthlanna neih turah Serchhip-VII VC atangin VC thar, Serchhip Chanmari VC siam turin hriattirna tichhuakin a ramri tur pawh tihfel a ni tawh a. He VC thar ramri tur siamah hian Serchhip-III VC area thenkhat chu rin tel a ni dawn nia hriain nimin zing khan Serchhip-III VC huamchhunga NGO leh Political Party hrang hrangte chuan Joint Meeting neiin an VC area lakthen tumna chu an duhloh thu an sawi a ni.

Nimin zing-a Lalpuithanga Hall-a Joint Meeting hi Serchhip-III VC-a Vice President, C. Lalhminghlua chuan kaihruaiin Serchhip-III VC siam ramri siam a nih laia hma latu leh VCP hlui, VL. Khama chuan Serchhip-III VC ramri siam a nih dan sawiin, ke-a Hriangtlang panna kawng atanga ft. 100 hnuailam zawng chu Serchhip-III VC Area a nih thu leh hetianga Khuavang ri kham ni lova ramri siam a nih chhan hi helai hmun, Kawrpui lui kama ram neitu zawng zawng deuhthaw hi VC-III area ami te niin, tunhma atanga huan siama tha taka enkawl leh chak lakna hmun a nih vang a nih thu a sawi bawk.

Serchhip-III VCP nilai, PC. Siamliana pawhin ramri tihdanglam tum a nih chungchang ah biakrawn an nih loh thu leh in dil pawh awm lova a ruka ruahmanna awm chu thalo an tih thu a sawi a. Nakin zelah Serchhip khawchhung zauhna tura an hmun neih that ber laksak tumna chu an remtih loh thu a sawi bawk.

Serchhip-III VC leh NGO bakah Political Party aiawh te kalkhawmte chuan an ramri tihdanglam chu tha an tihloh thu sawiin, an remtih loh thu hi DLAO Serchhip-ah ziaka thlenin, ramri siam thar hi kaltlangpui luih tumna a awm chuan a tul dan ang zelin chak taka hmalak zui nise an ti bawk.