Latest News

Health Minister in mipuite chi-ai lo turin a ngen

Health Minister, Dr. R. Lalthangliana chuan tunhnaia Mizoram mi leh sa tangkhang lo haw lai hian chi-ai lo a, fimkhur leh dawhthei taka mitin te awm turin a ngen.
Health Minister, Dr. R. Lalthangliana hian nimin khan Khawzawl District Level Task Force Meeting chu Zaingen YMA Hall-ah hmanpuiin kum 2019-a District thar pathum piang zinga pakhat, Khawzawl District-ah hun tha tak a nei chu lawmawm a tih thu sawiin, COVID-19 hripui leng dona kawnga Khawzawl District chhunga hmalatute chu fakawm a tih thu a sawi a. Khawzawl District chhunga Medical Officers te chu an huamchhung theuha VLTF te fimkhur taka hma la zel tura lo ngen turah chahin, COVID-19 kai theihna hmun te thliar thiama, theihtawpa inthlahdah lova awm reng turin DLTF te chu a chah bawk.
Health Minister Dr. R.Lalthangliana chuan Khawzawl, Hnahthial leh Saitual Hospital-ah thawktu mamawh zual 30 theuh lak a nih tur thu sawiin, heng bakah hian District Hospital a hman tur Ambulance thar pawh Sawrkarin a ngaihtuah sak ang tih a sawi a. Khawzawl Hospital-ah Ultrasound, Endoscopy khawl dah sa enkawl turin a ranglama Technician dah a nih tur thu leh a khawtual mite an awm phei chuan ngaih pawimawh an nih tur thu a sawi a. Khawzawl District Bawrhsap hnenah PPE, Sanitizer bawm 80, N95, 3 Layer Mask leh Bleaching Powder a hlan nghal bawk a ni.
He huna tarlan a nih danin Khawzawl District Hospital-ah COVID-19 avangin khum 20 buatsaih a ni a. Khawzawl District-ah hian COVID-19 do nan NSS, NGO leh mimal volunteer 292 an in register tawh a. Lockdown tirh atangin Khawzawl District chhunga hnathawk tangkhang 334 an awm bawk. Khawzawl mi leh sa hmundang a tangkhang, Khawzawl District-a haw tawh zawng zawng chu mi 238 an ni a, heng zingah hian hmeichhia 158 (66.3%) leh mipa 80 (33.7%) an ni. Khawzawl District-ah hian Quarantine Centres 26 awmin mi 530 awm theihna tur Khawzawl Bawrhsap kaihhruaina a buatsaih a ni a. Tun dinhmunah mi 187 Quarantine Centres hrang hrangah an awm mek a, lo thleng leh tur Uttar Pradesh atangin mi 3 leh Haflong atangin mi 2 beisei mek an ni.

Comments

Popular News (Last 30 Days)