Agriculture Development Board thukhawm

Nimin khan Agriculture Minister, C. Lalrinsanga hovin Agriculture Development Board chu an thukhawm a, tunhnaia District hrang hrang an tlawhna report ngaihthlak a ni.

He thutkhawm Agriculture Minister Pisa-a neih ah hian Agriculture Minister, C. Lalrinsanga chuan COVID-19 boruak avangin mahni pawimawhna zawn apiangah invenna leh intodelhna kawngah mipui leh Department hrang hrang kan che suau suau tih sawiin, tu te pawhin theihtawp an chhuah thu a sawi a. Khauh taka lockdown kalpui a nih lai pawhin Agriculture Department chuan bahlah vak lovin hma an la thei chu lawmawm a tih thu sawiin, Pathian malsawmna nia a hriat thu leh Agriculture Develpment Board Member leh official lam te thawhhona thatzia a sawi bawk.

COVID-19 boruak avangin a tir lamah loneituten harsatna an tawk tih pawh sawiin Minister chuan, amaherawhchu sawrkar laipui pawhin an pawimawh zia hriain lockdown khauh tak hnuaiah pawh loneitute tan hna thawh phalsak an nih tak thu a sawi a. Intodelh tura hma kan laknaah Agriculture leh a kaihhnawih department-te leh loneitute pawimawhzia a lang a ni, a ti bawk.

He thutkhawm ah hian Agriculture Development Board Vice Chairman, H. Biakzaua MLA pawhin COVID-19 boruakah mipui an thlaphan laiin loneitute hamthatna ngaihtuaha zinchhuah programme an buatsaih chu a hlawhtling hle nia a hriat thu a sawi a. Sawrkar laipuiin loneitute tana a bik taka a duan loneituten kum khata Rs. 6000/- dawn theihna, Pradhan Mantri Kisan Samman Nidhi (PM-KISAN) chungchang te, loneituten thlatin pension an dawn theihna tur Pradhan Mantri Kisan Mandhan Yojana leh sawrkar hmalakna dangte inhrilhfiahna hun atan an hmang tangkai hle niin a sawi bawk.

District hrang hranga buh leh bal thar tam zawk theihna tur atana leilet siam chungchang zirchiang tur te, loneitute dinhmun a taka hmuhpui tur leh an harsatna tawh mek te chinfel dan ngaihtuah turin Agriculture Minister, C.Lalrinsanga leh Board Vice Chairman, H. Biakzaua te kaihhruaina hnuaiah Agriculture Development Board member-te chu pawl thum-ah inthenin May thla chhung khan Mizoram an fang a. Group-I hian chhim lam fangin Keitum, Hnahthial, Lunglei, Lawngtlai, Siaha, Chawngte, Diltlang leh Tlabung an tlawh a. Group-II hian Saitual, Chhawrtui, Khawzawl, Champhai, Serchhip leh Thenzawl tlawhin, Group-III hian Kolasib, Bilkhawthlir, Bairabi, Zawlnuam, N.Bukpui bakah Serkhan - Bagha road-a khaw hrang hrangte an tlawh a ni. COVID-19 dona atana hmalakna a hlawhtlingin thlai thar pawh a pun beisei a ni a, a hralh chhuah dan tur pawh Meeting-ah hian rel nghal a ni.