Green Mizoram Day pualin Serchhip District-ah Bawrhsap hovin thingtiak phun a ni

Mizoram ti hring tura thingphun beihpuithlakna Ni, Green Mizoram Day chu nimin, June 11, 2020 khan Mizoram-ah hman leh niin Serchhip-ah pawh District Bawrhsap hovin sawm bik mi tlemte ten thingtiak phunin hun an hmang a, Sawrkar Department hrang hrangten an remchan angin thingtiak an phun bawk.

Mizoram-ah inkharkhipna khauh taka kalpui mek a nih avangin Serchhip-ah chuan Serchhip leh Thenzawl inkar-a Zehtet ram-ah Serchhip District Bawrhsap, Dr. Lalzirmawia Chhangte hovin sawm bik mi tlemte te chuan Green Mizoram Day pual hian hun hmangin tingtiak an phun a, he hunah hian Bawrhsap chuan inkharkhipna kalpui a nih avanga kumdanga Green Mizoram Day an hman thin dan ang ni lova hun remchang DFO leh a thawhpui ten an ruahman chu lawmawm a tih thu sawiin, kumin a Green Mizoram Day-ah hian ‘Tun hi thing phun hun chu a ni’ tih hman a nih thu a sawi a. Bible-ah pawh phun hun a awm thu a inziak tih sawiin, a hun taka thil tih a nih chuan hlawhtlin a awlsam bik thu a sawi a. Thal laia thing phun chu a nun that theihloh thu leh Fur lai, tunlai-a phun chu a nun that dawn mai bakah a than pawh thain a puitling hma thei dawn tih a sawi a. Kan ram tih nawm zel nan te, kan khawsakna tih changtlun zel nan te, tui hna tha kan neih zel nan te, boruak thianghlim kan dawn zel theih nan te kan ram tih hrin that leh tih ngaw chu a tul em em tih a sawi a. Department kutah ngawt dah lovin mipui ten nachang kan hriata tha kan thawh tam lehzual a tul thu pawh sawiin, mipui ten kan zavaia kan thawh tlan chuan a hlawhtlinna hmuh a awlsam bik tih a sawi bawk.

Bawrhsap chuan thingphun pawimawh zia sawiin, khawvel-a cheng mihring te leh thing leh mau bakah nungcha tinreng te chu in mamawh tawn vek leh inlaichin vek kan nih thu sawiin, kan ram hi Thlaler ang leh ramngaw chereu tak a nih chuan tuna kan hmuh ang thing te, boruak thiang-hlim te chu kan nei thei dawnlo tih a sawi a. Mi thahnem ngai, sawrkar te leh mipui ten theihtawp chhuaha ramngaw kan humhalhna leh kan siam chhoh zelna te avangin kan ram chu ala hrin that thu leh India ramah Forest Cover nei tha ber pawl kan la nih thu sawiin, lawmawm a tih thu leh a humhalhtu kan nih zel a pawimawh thu a sawi a. Kan ramngaw te chu Thal laiin kangmei in min tihchhiat sak fo thin tih pawh sawiin, chutianga mi fimkhur lo te avanga kangmei chhuak thin laka theihtawp chhuah thin te chungah lawmthu sawiin, ramkang thleng thin te chu veng zel tur leh ram tikang lo tura fimkhur zel turin mipuite chu a chah a, kan thingphun te a enkawl zuitu leh a venghimtu nih tum zel turin mipuite chu a chah bawk.

Nimin a Green Mizoram Day pual hian Serchhip District Bawrhsap, Dr. Lalzirmawia Chhangte leh Serchhip SP, R. Sathiyasundaram bakah Addl. DC, DFO Thenzawl, DIPRO Serchhip, Settlement Officer Serchhip leh he huna tel thuthar thehdarhtute chuan Serchhip leh Thenzawl inkarah hian thingtiak an phun nghal a, tun tumah hian thingtiak 32 chu kawngpui kam-ah phun niin nikum lama lo phun tawh te pawh samfai an ni bawk a ni.

Inkharkhipna kalpui a nih avanga a huhova Green Mizoram Day hman theih a nih loh avang hian Serchhip District chhunga Sawrkar Department hrang hrangte chuan anmahni rem-chan dan ang theuhin Green Mizoram Day pual hian thingtiak an phun bakah kum hmasa lama an lo phun tawh te enkawl zui hna an thawk bawk a, thingtiak phun turte tan hian DFO Then-zawl hnuaia Forest Range hrang hrang ten thingtiak hi semchhuakin hriat theih chinah Forest Department hian thingtiak 520 semchhuah a ni.

Green Mizoram Day hi kum 1998 atang khan hman niin nikum thleng khan thingtiak 16,46,289 zet hnatlanga phun tawh niin 22,35,963 zet mimal leh pawlho hnenah semchhuah tawh a ni bawk.