Chanchin thar thenkhat :

Nomination paper pawm vek

Mizoram in Rajya Sabha-a Seat khat a neih hnawhkhahna tura inthlanna neih tura chuh tumte Nomination Paper chu nimin khan endik niin pawm vek a ni. Rajya Sabha member thlanna neih turah hian MNF Official candidate, K. Vanlalvena, Congress Official Candidate, Dr. Lallianchhunga leh ZPM Official Candidate, B. Lalchhanzova-ten hming a pe, heng mite Nomination Paper hi nimin khan Returning Officer, H. Lalrinawma'n endikin, an dilna hi a pawm vek a ni. He inthlan chuh tumte tan hian tunkar Zirtawpni thleng inhnuhdawhna hun hawn a ni anga, tun thl ni 19-ah Vote thlak a ni ang.

Lunglei-ah COVID-19 kai tam

Lunglei District Bawrhsap, V. Lalsangliana chuan nimin khan Lunglei-ah thuthar thehdarhtute kawmin Lunglei District-ah COVID-19 kai mi 43 hmuh belh an nih thu leh tunah hian an District-ah COVID-19 kai mi 45 an awm tak thu a sawi a. Heng mite hi Lunglei Govt. College Quarantine Centre-a mi 35, Eklavya Pukpui-ah mi 3, Govt. High School Chanmari-ah mi 2, BCM Electric Veng Quarantine Centre-ah mi 2 leh Home Quarantine mi pakhat an ni tih sawiin, State hrang hrang pakua atanga tangkhang lo haw te an nih thu leh an zinga mi 24 te chu Delhi atanga rawn haw an nih thu a sawi a. Heng mite enkawlna atan hian ETC, SIRD Pukpui-a Covid Care Centre awm mek chu Dedficated Covid Health Centre atana puan niin, Lunglei Govt. College chu Covid Care Centre atan puan nghal a ni bawk

Cheng nuai 1 pe dawn

Tunhnaia COVID-19 laka Mizoram a him theihna tura Indo-Myanmar International Border Fungsihchhuah (Near Saisihchhuah)-a Duty leh a Duty-na a a damloh hnua Malaria avanga niminpiah-a boral zui ta, H. Carolyn Lalvenmawii (18) D/o H. Kapliana, Sangau-I chu nimin khan Sangau-ah vuiliam a ni a, Lai Hnam Pasaltha boralte thlahna leh Chawimawina anga ropui leh zah taka vuiliam a ni. Mizoram sawrkar chuan hetianga Chhimtuipui ramri-a duty laia damlo nunna chan ta hi Chief Minister's Relief Fund atangin Rs. 1,00,000 pek a ni dawn tih sawiin, Lawng-tlai DC kaltlanga pek tura ruahman a ni.

Sum dawng leh niin sawi

BJP Mizoram Pradesh chuan tunkar Thawh-lehni tlailam khan Mizoram sawrkar chu PM Cares Fund atangin tangkhang te hruai haw na tur cheng nuai 161 pek a nih thu sawiin, lawmawm an tih thu thuchhuah siamin an tarlang a. He sum hi mi chi hrang hrang thawhkhawm a nih avangin tangkai tak leh a nihna tur ang ngeia hmang ngei turin thawktute chu an ngen bawk.

Minister ten hlawh chhunglut

COVID-19 dona atana hmalakna kal zela a tul anga hman turin nimin khan Deputy Chief Minister, Cabinet Minister pali (4), Minister of State paruk (6) leh HPC Lunglei Vice Chairman te chuan an May thla bi hlawh, Basic Pay atanga 50% (Rs.40,000), a vaiin Rs. 4,80,000 chu CM Relief Fund-ah an chhunglut a, hetiang hian December thla thlengin an pe thin dawn a ni.

Khawl thar rawn thleng

COVID-19 vei leh veiloh test na RT-PCR khawl in chak zawka hna a thawh theih nana pawimawh ber, RNA Automated Extraction System chuan nimin khan Aizawl a rawn thleng ta a, heng khawl hmang hian Sample atangin RNA lakchhuah hna awlsam zawka thawh tur niin hman theih a nih hunah chuan nikhat ah Sample sang chuang enfiah theih beisei a ni.