Tarpi tlang vel Containment Zone leh Unit-ah puan a ni

Serchhip District Bawrhsap chuan Serchhip Chanmari Veng, Tarpi tlang-a SIRD&PR District Panchayat Resource Centre (DPRC) Campus chu Regulation 11(1) of the Mizoram Epidemic Disease (COVID-19) Regulations, 2020 hnuaiah Containment Zone-ah a puang a, a building chu Containment Unit ah a puang bawk.

Hemi chungchanga thuchhuah a siamah District Bawrhsap, Dr. Lalzirmawia Chhangte chuan tunhnaia state pawn atanga rawn haw mi pakhat, a lo thlen ni atanga SIRD&PR District Panchayat Resource Centre-a khunghran (isolate) nghal chu RT-PCR result atangin COVID-19 a positive tih hriatchhuah a ni tih a tarlang a.

Hei vang hian Regulation 11(1) of the Mizoram Epidemic Disease (COVID-19) Regulations, 2020 in thuneihna a pek angin he building awmna leh a chhehvel, Building atanga hmar-lam meters 140, chhak lam meters 75, chhim lam meter 120 leh thlanglam meter 70 huamchhung chu Containment Zone-ah a puang tih Bawrhsap thuchhuah chuan a tarlang a. A building pawh Containment Unit-ah puangin he building, Isolation Centre atana hman meka midang awm ve, RT-PCR result atanga Negative vek te chu hmun danga khunghran (quarantine) tura sawn chhuah an ni tih a tarlang bawk.

Hetiang a nih avang hian helai hmun (Tarpi tlang chhip) area hi khar (sealed) nghal a ni a, a huamchhunga phalna nei lova luh leh chhuah reng reng khap tlat a ni a. SIRD&PR Offices hi thu leh awm hma chu khar nghal a ni bawk a, lirthei eng chi mah Containment Zone chhunga chetvel phal a ni lo a. Tupawh, mimal, pawl leh institution he thupek bawhchhiate chu IPC Section 188 anga hrem theih an ni ang. Hei bakah hian he Zone chhunga cheng mipuite leh Officials duty zawng zawngte chu Aarogya Setu Apps download-a in register nghal vek tura hriattir an ni bawk.