ENGTIN NGE KAN KAL ZEL DAWN?

ENGTIN NGE KAN KAL ZEL DAWN?
- Rev. Dr. Zaichhawna Hlawndo

COVID-19 hrileng avangin ni 82 chhung kan in kharkhip tawh a. Chawlhni vawi 12 chhung Biak In zawng zawng kan khar tawh a. Kristiante hunpui Tumkau Ni, Good Friday, Thawhlehna ni, Thlarau Thiamghlim thlen ni (pentecost) leh Kohhran ni pawimawh leh inkhawmpui pawimawh tam tak kan hmang theilo. Kharkhip dan siam leh zawm that chungchangah chuan India ramah pawh a titha ber pawl kan ni. Hrileng do hi a pawimawh a a that em em laiin tunah hian eng dinhmunah nge kan din a, engtin nge kan kal zel dawn tih hi Pathian kan rawn a ngai.
Hrileng kan do dan hian kan thlarau, rilru leh taksa tan kan hlawkpui nge kan chhiat phah? Quarantine Centre a kan in dah dan leh enkawl dan ah kan Kristianna in hmun a chang tawk em? Hri kan dona hian kan Kristianna, hnamzia, eizawnna leh sum leh pai dinhmun hi a that phah nge a chhiat phah tih hi ngun taka kan ngaihtuah loh chuan mawl takin kan kal anga, at man chu kan chawiseng lo mai ang tih hi a va hlauhawm tak em!
Tunah ramdang atanga lo haw te positive 100 chuang kan hmuh ve te hian min ti zam ta mai em ni? Heng hri lo kaive a tam zawk chu engmah an taksaa langchhuak miahlo hritlang satliah ang chauhte an ni. He natna hi inkaichhawn theih natna chu a ni tih chu kan hailo. Amaherawh chu a kaite chenpuite, awmpuite leh chhungten a fimkhur leh fimkhurlo te pawhin an kaiin an kailo kherlo tih chu khawvel hriat a ni. Tin, he natna hri hi a hnukhawi lam tawh nite pawhin a lang a, Pathian khawngaihna a zarah a vei tuman an thihpui loh pawh beiseiin i tawngtai zel ang u. Tuna kan kharkhip hun hman tawh, hman mek leh hman leh dan atan a hnuaia point hmangte hian ngun takin i ngaihtuah ang.
1. Thihna te hlau tawp lo turin kan nunna thuhruk a ni tih hla sa a Pathian fak a lam thin te kha khawiah nge kan awm zawh tak aw? Kan ram, khawtlang leh Kohhran hruaituten hrileng min do pui dan hian min khuahkhirh in hlauhna thlarau min pai tir ta mai em ni? Engtin nge kan kal zel dawn?
2. Pathian ringtu 100% in chhal ngat ngam hnam. Pathian be lova tlei theilo, inkhawm loh tur tih thupek eng anga khauh pawh siam se keini zawng kan Lalpa Isua Krista fak leh chawimawi lovin kan awm thei lovang ti thinte kha kan ni si a, Pathian fakho te hi hrileng kaina emaw kan himna daltu tur zawk niin kan ngai ta mai em ni le?
3. Kan Pastor leh Kohhran Upa fel tak takte kha- Tunah hian in Beram enkawlte natna hrileng hmanga Setana’n a rum thaih mek leh an thlarau rilru leh taksa a awpbeh leh tihduhdah mek Quarantine Centre a awm leh mahni In chhunga a khungte hian chhan chhuaktu tur an mamawh asin. Tun hun hi a ni dawn lawm ni an tana rawngbawl dan tur kawng zawnga theih tawp kan chhuah hun tur chu.
4. Kan pipute Zonunmawi chhiatni leh thatni a bo abang awm lova intawiawm dial dialna nunze mawi, khawvel a phochhuah tlak tlawmngaihna te kha hrileng hlauhna thlarau hmangin kan umbo zo mai dawn em ni? Mitthi pawh vui tha thei lovin, Inneihni ropui takte hmang ngam lova hrileng do emaw hlauh hi kal dan zel dan tur tha ber a ni thei dawn em ni?
5. Kan Pathian thu chuan "Lalpan hlauhna Thlarau min pe lova thiltihtheihna leh hmangaihna leh rilru fel tak neihna thlarau min pe zawk a ni (II Timothea 1:7)" tih ringtu leh dawngtute nun dan tur leh Kohhran pawlho in hrileng kan do dan te, LTF tlangau thupuan dan te, kan inkhuah-khirh dan te leh thuneihna kan lekkawh dante hi a in persan deuh lo maw?
6. A thu chuan Pathian leh kan ram tan titu -rorelna chelhtuten hrileng dona a hmalakna ah hian Pathian engkim chunga thuneitu hian tih tur emaw, chanvo a neive talo em ni? Pathian engkim chunga roreltu lam hawi tura mipuite fuih, hruai leh thlamuan aiin he hrileng COVID-19 hi kan dah lian zel zawk dawn em ni?
7. Tun huna ram, khawtlang leh Kohhran hruaitute hian hrileng kan do kawngah hian mihring ban tha chakna nge Pathian thiltihtheihna rinchhanin kan kal tihte pawh hi in enlet a hun lo maw?

Comments

Chhiar Hlawhte