COVID-19 kai hmuhchhuah 3,43,091 tling tawh

Nimin thleng khan India ramah COVID-19 kai hmuhchhuah mi 3,43,091 tling tawhin nunna chan mi 9900 an tling tawh bawk. Ministry of Health & Family Welfare chhinchhiahna atanga a lan danin nimin thleng khan India ramah hri kai hmuhchhuah mi 3,43,091 tling tawhin, heng zingah hian mi 1,80,012 te chu enkawl dam ni tawhin hei hi za zela 52.46 niin hri kai enkawl mek 1,53,178 an awm thung a, hri kai enkawl mek aiin enkawl dam hi 26,834 in an tam zawk a ni. Hetihlai hian hri kai zingah nunna chan mi 9900 an awm tawh bawk a, hei hi hri kai hmuh-chhuah zawng zawng atangin zaa 2.88 an tling a, darkar 24 kalta chhung khan nunna chan mi 325 an awm a ni.

ICMR chuan COVID-19 hri endik theihna hmun a tipung zel a. Tunah hian sawrkar Laboratory 659 leh mimal Laboratory 248 hnenah COVID-19 endik phalna a pe tawh a. Ramchhunga Laboratory 907-in COVID-19 sample an endik thei tawh a ni.