Custom Hiring Centre atan Tractor 5 vailiam

Agriculture Minister, C. Lalrinsanga chuan nimin zing khan Sub-Mission on Agricultural Mechanization (SMAM) 2019-20 hnuaiah lei lehna Tractor 50 sem chhuah tur atangin Custom Hiring Centre dinna hrang hrang tan Tractor 5 a vailiam.

Buh leh bala intodelhna tura hmalakna zinga pakhat leh tam zawk tharchhuahna tura Sub-Mission on Agricultural Mechanization (SMAM) 2019-20 hnuaiah heng Tractor vailiamna hun nimin zing-a Directorate of Agriculture Office kawt, Aizawl-a neih ah hian Agriculture Minister, C. Lalrinsanga chuan COVID-19 leng karah intodelh tur leh intodelh thei nih inhre rana hnampui zia lo langa, hmasawn tura chhungkaw tin an phe ta suau suau chu ropui a tih thu leh hei ngei hi hnam leh sakhaw humhalhna kipui ber a nih thu a sawi a. Hnam zahawmna leh Chanchintha hrilh te chu thu benglut ni tur chuan chhungkawtin fairelbel chhunkhah a ngaih rualin, tharchhuah ni lo State dang thar rei tak kan lo rin tawh Dal, Alu, Purun, Tomato leh Tel bakah Mizoram-in a deh chhuah ve theih tho si ram dang atanga chawkluh bungrua, thlai leh ran thlengin taimakna hmanga hnawtchhuak turin kalkhawm te leh ram mipuite a sawm a ni.

Agriculture Minister chuan SMAM hnuaiah kumin chhung hian Agriculture Department hian Trailer, Rotavator leh Paddy Reaper telin Tractor 50 (sawmnga), Power Tiller lian 75 (sawmsarih panga) leh Mini Power Tiller 75 (sawmsarih panga) sem chhuah an tum thu a sawi bawk.

Minister hian a thawhkhat nana leilehna tractor a vailiam te hi- Tuipui Zau, Tlangsam; Chhimluang WRC Farming Society, Kawlkulh; Farming Co-operative Society, Ruantlang; Dingdihlipa Sih Zau, Chawngtlai leh Zopuite, Champhai ami turte a ni.