COVID-19 in min chenchilh tak avang hian tualchhunga inkaidarh a hlauhawm - Health Minister

Health Minister, Dr. R. Lalthangliana chuan COVID-19 in Mizoram a chenchilh tak avanga tualchhunga inkaidarh (Community Spread) a hlauhawm ta hle a ni, a ti.
Inrinni-a mipuite hnena thuchah a tihchhuah ah Health Minister chuan tun hun hi fimkhur zual a pawimawh hun lai ber a nih avangin mitinin an himna tur a ni tih hriain sawrkarin ruahmanna a siamte tha taka zawm a pawimawh hle a ni, a ti a. “Hrehawm deuh mahse hun reilote chhung thuawih taka tan tlan chuan he natna hi hnehin a awm ngei ang,” a ti bawk. Health Minister chuan thla hnih leh a chanve vel zet Mizoram-a COVID-19 vei thar an awm loh hnuah June ni 1, 2020 khan a rualin mi 12 zet hmuhchhuah a nig thu leh hemi hnu hian nitin hmuhchhuah thar a awm ta mai tih sawiin, “Heng COVID-19 natna vei hmuhchhuah tharte hi a naupang ber kum 19 niin a upa ber kum 45 a ni a, State dang atanga tunhnaia lo haw, khunghran lai vek an ni,” tiin tun dinhmunah ngaihtuahawm an awm rihlo tih a sawi bawk.
Health Minister chuan rei tak hri vei thar hmuhchhuah an awm loh avangin mipui an inthlahdah tan ni a a lan thu leh mitin fimkhur thar lehzual a tul thu sawiin, Hmuituamna vuah leh inhlata awm tur thupek zawm a, kut silfai bakah taksa leh chenna vel te thianghlim taka enkawl turin mi zawng zawng a chah a. “Sawrkar pawhin hengte hi zawm a nih theih nan Dan a siam a, thu awihlo chu hmun leh hmuna pawisa chawitir bakah lung In tan tir hial theih a ni,” a ti bawk a. Khunghran te pawh an chhuah hnuah kar khat tal chu pawn chhuak lo tur leh inchhungah pawh chenpuite nen inhnaih pawh lutuk lova hun hmang tura chahin, hmuituamte la zawm turin a chah a, an chhungte pawhin lo ngaipawimawh turin a chah bawk.
Health Minister chuan IBSD, Imphal-in RT-PCR Quant Studio TM-5 Mizoram sawrkar a hman hawh tirlo thleng chu ZMC-a hman tura buaipui char char a nih thu leh khawl thar pahnih, NHM leh mimal sum pek hmanga chah a nih thu sawiin, hun reilote ah Mizoram a rawn thlen a beisei thu a sawi a. SDRF atangin PCR test tam zawk tih theihna atana hmanraw pawimawh, Automated RNA extractor lei tura hmalak mek a nih thu sawiin, Inrinni khan Forensic Science Laboratory ta pawh ZMC-ah dah phei a nih thu leh hman theiha peihfel a nih hnu ah chuan ni khatah Swab sample 1,000 chuang test ziah theih a ni tawh dawn tih a sawi bawk.
COVID-19 natna veite zinga za zela 80 chu na lutuk lo, ‘Mild case’ an nih thu sawiin Dr. R. Lalthangliana chuan, heng mite hian Oxygen leh Ventilator an mamawh lova, enkawl nan ZMC kher a ngailo tih a sawi a, a enkawlna tur District hrang hrangah COVID Care Centre (CCC) leh Dedicated COVID Health Centre (DCHC) ruahman fel vek tawh a nih thu a sawi a, COVID-19 vei hmuhchhuah belh zel a nih pawhin CCC leh DCHC hi ruahman belh zel a ni ang, a ti bawk.

Comments

Chhiar Hlawhte