Mizoram-ah COVID-19 kai hmuhchhuah belh zel a ni

Inrinni khan Mizoram-ah COVID-19 hri kai 10 hmuh belh leh niin heti hian tun thlengin hri kai hmuhchhuah mi 34 awmin 33 te chu enkawl mek an ni.
Inrinni khan ZMC Laboratory-ah hian Sample 261 enfiah leh niin heng atang hian COVID-19 kai mi 10 hi hmuhchhuah an ni a, heng hri kai hmuhchhuah te hi Mamit District mi 7, Lawngtlai District mi 2 leh Aizawl District mi 1 te an ni a, mipa 7 leh hmeichhia 3 niin tun-hnaia Delhi atanga lo haw vek an ni. Sawrkar hotute hnen atanga thudawn danin hri kai hmuh-chhuah tharte hi an ngaihtuahawm lova, kum 16 leh 29 inkar vek an ni.
Heti hian Mizoram-a COVID-19 kai hmuhchhuah tawh chu 34 niin heng zinga mi 1 chu enkawl dam ni tawhin midang 33 te chu enkawl mek an ni a. Mizoram-a hri kai hmuhchhuah tawh mi 34 zinga mi 30 hi Delhi atanga rawn haw niin Kolkata atanga rawn haw mi 2 leh Gujarat leh Foreign (Netherland) atanga rawn haw mi pakhat ve ve an awm bawk a ni.

Comments

Chhiar Hlawhte