Zirna In hawn hun thu ah ruahmanna tha zawk siam duh

Mizoram Pradesh Congress Committee (MPCC) chuan Mizoram a zirna In te hawn chungchangah zirlaite leh Zirtirtute hmakhua thlir chunga ruahmanna tha zawk siam tum turin Mizoram sawrkar chu an ngen.

Nimin a thuchhuah an siamah MPCC chuan tun thla ni 5-a Congress Legislature Party (CLP) member te leh MPCC Political Affairs Committee (PAC) Joint Meeting chuan Mizoram-a zirna In hawn hun tura ruahmanna kal mek ngaihtuahin, Mizoram sawrkarin July 15, 2020 atanga School hawn leh tuma ruahmanna a siam leh, July 13, 2020 atanga College hawn tan leh a tum chu COVID-19 avanga Mizoram hun tawn mek thlirin Congress Party chuan la hun rihlo hle ah an ngai tih an sawi a. COVID-19 hri vei thar Mizoram-ah a pun zel avangin zirlaite leh zirtirtute hmakhua thlir chunga ruahmanna tha zawk siam tum turin Mizo-ram sawrkar chu an ngen a ni.

Hei bakah hian MPCC thuchhuah chuan June 5, 2020 (Zirtawpni) khan I&PR Minister, Lalruatkima chuan a Pisa-ah lehkhabu a tlangzarh nia tarlangin, mi engemaw zat an kalkhawm bawk niin an tarlang a. Hei hi Union Home Ministry thupek leh Mizoram sawrkarin Lockdown chungchanga May 31, 2020-a thupek a chhuah, IPR No.1516/2020-2021 a tarlan Section E (2) "Mipui punkhawmna, heng inneih lawmna (reception), lungphun, anniversary leh birthday lawmna, games & sports tournament, book release, politics leh pawl thila kalkhawmna, intihhlimna ang chi reng rengte chu he hun chhung hian huaihawt phal a ni lo" bawhchhiatna dik tak a ni tih an sawi a. Dan bawhchhetu Minister leh he programme organise-tute chu he Dan vekin hremna tur a tarlan, Disaster Management Act, 2005 leh IPC Section 188 hmanga hrem ngei turah an ngaih thu sawiin, Information & Public Relations Minister meuhin sawrkar Dan siam, a Department-ten nasa taka an puanzar ngei a bawhchhia chu mak an tih thu leh Mizoram mipui leh Dan siamtute zahlohna dik tak ni ah an ngaih thu an tarlang bawk.