COVID-19 enkawlna tur

Serchhip District-ah COVID-19 Positive Case awm thut thei a nih avangin damlo te enkawlna tur ruahman a ni.

Hemi chungchanga nimin a Serchhip District Bawrhsap in thuchhuah siama a tarlan danin Serchhip District chhunga Quarantine Facilities indaih zawka hman a nih theih nan SIRD Hostel Serchhip chu COVID-19 Positive case an lo awm palha treatment pekna atan hman tur a ni dawn a. Tourist Lodge (Highway Restaurant) Chhiahtlang leh Ayush Hospital, Thenzawl te chu RAT Reactive emaw, Contact tracing avanga dah hran ngai emaw, Symptom nei emaw te dahhran nana hman tur niin Forest Rest House, Serchhip chu chhan hrang hrang avanga rinhleh dahhran te, PCR test tih hnua negative a ni tih hriatchian ten Quarantine hun an hman tling tlakna atana hman tur a ni dawn thung a. Heng bakah hian Quarantine Facilities dangte pawh a tul anga hman zel theih a ni ang.

Hetihlai hian tunhnaia Covid Care Centre tura ruahman chhin, Nursing School sak mek chu Electric Transformer thar ngaihtuah a tul avangin hman theih a ni dawn rihlo nia thudawn a ni thung.