Chanchin thar thenkhat

COVID-19 kai hmuh belh zel

Nizan hmasa khan Mizoram-ah COVID-19 kai hmuhchhuah belh mi 8 awm lehin heti hian tun dinhmun ah Mizoram-ah COVID-19 kai enkawllai mi 41 zet an awm ta a ni. Tunhnaia Mizoram-a rawn haw te Swab Sample enfiah chhoh mekah ZMC Laboratory atangin COVID-19 kai hmuhchhuah belh zel an ni a, niminpiah khan Sample 244 enfiah leh niin heta tang hian COVID-19 kai mi 8 hmuhchhuah thar leh an ni a, heng mite hi mipa 3 leh hmeichhia 5 niin heng mite hi tunhnaia Delhi atanga rawn haw leh inkhung-hranna hmun siam-a khung hran mek te an ni a. Champhai District mi 5, Khawzawl District mi 2 leh Siaha District mi 1 niin kum 21 atanga kum 30 inkar mi vek an ni a. Natna langchhuak lo vek an ni bawk. Heti hian tun dinhmunah Mizoram-ah COVID-19 kai hmuhchhuah mi 42 awm tawhin heng zingah hian mi pakhat chu enkawl dam a ni tawh a, tunah hian mi 41 te chu enkawl mek niin nunna chan erawh an la awmlo zel a ni. 

Hnam rilru pu turin chah
All Mizoram Farmers’ Union (AMFU) Gen. Hqrs. chuan kan ramin COVID-19 hripui kan hmachhawn mek hian engtia rei nge min cham-chilh dawn a hriat loh avangin ei leh bara harsatna lutuk kan tawh lohna turin kut hnathawktute chu Hnam rilru pu a, kan intodelh theihna tura taimak chhuah thar zel turin AMFU General Headquarter chuan an ngen a. He hripui doletna tura sawr-kar, Mipui, Task Force, NGO’s leh Kohhran te tanrualna leh thawhhona lawmawm an tih thu leh an thlawp tlat thu pawh tarlangin, ei leh bar-a Mizoram kan intodelh theihna tura Sawrkar hma-lakna te chu an thlawp thu an sawi bawk.

Agri. Minister-ah thlen
Mizoram Cultivators & Labour Union (MIC-LUN) hruaitute chuan nimin zing khan Agriculture Minister, C. Lalrinsanga chu a chenna In ah kawmin kuthnathawktu ten harsatna an tawh te an thlen bakah ei leh bar-a intodelhna siam theih dan turte an sawipui bawk.

Zirna Uar sawihona nei
Central YMA-a OB te leh Kumpuan Sub-Committee hruaitute chu nimin khan Mizoram Teachers’ Federation (MTF) hruaitute nen Central YMA Office-ah inkawmin YMA Kumpuan, Zirna Uar chungchang an sawiho a. He hunah hian kan ram-a zirna in hma a sawn dan tur kawng hrang hrang sawihoin tun aia tha zawka Sawrkar School thuamthat a tul thu te, mahni hnam tawng (Mizo tawng) tun aia dik zawka hmang tura inzirtir a ngaih thu te, zirlaite lehkha chhiar tam leh zual tura infuih a tul thu te, zirlai bu piahlam a lehkhabu chhiar tam tura infuih a pawimawh thu te, Central/All India Service-a lut tam tura zirlaite fuih thar a ngaih thu leh zirna lama chaklo deuh zawkte dawm kan leh an hmakhua tur ruahman pui a pawimawh zia te sawiho a ni bawk.

MSU in Minister-ah thlen
Mizo Students’ Union (MSU) General Hqrs. hruaitute chuan nimin khan School Education Minister, Lalchhandama Ralte chu hmuin sawr-kar thuchhuah zawm lova Fee la te chungah a tul anga action la turin an ngen. MSU General Hqrs. hruaitute hian Minister hnenah hian ‘Private School te’n Lockdown chhungin School Fees 50% aia tamlo lak tur’ tia sawrkar thuchhuak zawmlo School te chu an thlithlai reng tih sawiin, June thla Fees lak chungchangah sawrkar thuchhuak zawm lo nawn te chu a tul anga an School License tihtawp leh School khar thlenga hmala turin Minister hi a ngen a. Minister hian hma a lak nghal tur thu leh sawrkar Order thar siam a nih tur thu MSU hruaitute hi a lo hrilh a ni.

Comments

Chhiar Hlawhte