COVID-19 dona ah hlawh nei lova Serchhip District-a thawk turin Serchhip nula a inpe

Serchhip District-a COVID-19 dona atana a tul ang leh a tul chen chen thawk turin Serchhip P&E Veng-a cheng, Jessica Lalremruati B.Sc (MLT) chu a inpe a, nimin khan Serchhip CMO, Dr. Laldawngliana Sailo hovin amah lawmna hi neih a ni.
COVID-19 dona-a a tul anga thawk tura inpe lawmna hun Serchhip CMO Office Chamber-a neih ah hian Serchhip CMO, Dr. Laldawngliana Sailo chuan Serchhip District-ah COVID-19 dona kawngah Team hrang hrang an siam thu leh chung zingah chuan Sample Management Team pawh siam a nih thu sawiin, tuna hri leng kan buaipui mekah pawh he Team hi thawk nasa ber te zing ami an nih rih thu a sawi a. He Team-ah hian thawktu an indaihloh hle laia hetianga mahni inpe a thawktu an nei thar chu lawmawm an tih thu sawiin, Jessica Lalremruati hian Sample lakkhawmna lama thawk mekte pui tura a thawh nghal tur thu a sawi bawk. He hunah hian Jessica Lalremruati chhungte bakah Serchhip District Medical Superintendent, Dr. ZD. Lalmuanawma te pawh an tek a ni.
Jessica Lalremruati hi R. Lalchhuanawma leh C. Lalmuanthangi te fa niin Serchhip P&E Veng-ah an chhungkua in an khawsa mek a, thiamna lama B.Sc (MLT) niin kum 2018 khan a zirchhuah hnuah hemi kum vek hian PC Pharmacy-cum-Polyclinic Centre, Lunglei Chanmari-ah a thawk nghal a, COVID-19 dona atana Serchhip District-a a tul ang ang a tul chen chen thawk tura inpe turin niminpiah khan a hna hi a bansan a, Laboratory-ah Sample enfiah hna te pawh a tul ang ang thawk thei tura thiamna nei a ni.

Comments

Chhiar Hlawhte