Latest News

Chanchin thar thenkhat :

Hri kai hmuh belh awmlo

Niminpiah khan Zoram Medical College (ZMC) Laboratory-ah Sample 821 enfiah niin result hriat tawh chin 633-ah hri kai hmuh-chhuah an awm lova, heng te hi ZMC, Kolasib, Tlabung, Lawngtlai, Hnahthial leh Lunglei atanga sample dawn te an ni a, nimin khan a bak Sample dang enfiah hna thawh leh nghal a ni. ZMC-ah hian nimin thleng khan COVID-19 damlo mipa 13 leh hmeichhia 34, an vaiin mi 47 enkawl mek niin, kum 14 - 57 an ni a, Aizawl District mi 31, Kolasib District mi 11, Saitual District mi 3, Serchhip District mi 1 leh Mamit District 1 te an ni. Heng damlo Isolation Ward-a awm mek 46 zingah khawsik nei pakhat a awm a, ICU-a damlo pakhat awm pawh ngaihtuahawm a nih loh thu thuneitute chuan an sawi bawk.

LADC sawrkar in sum hlan
Lai Autonomous District Council (LADC) sawrkar chuan COVID-19 hri leng dona kawnga a tul anga hman atan nimin khan Lawngtlai DC hnenah cheng nuai thum (3) hlanin District Hospital Lawngtlai-a District Medical Superintendent kutah cheng nuai hnih (2) an hlan bawk a. Heng sum te hi LADC-a Chief Executive Member, T. Zakunga leh Executive Member-te bakah LADC official-te chuan hlanin he sum hi LADC Budget Session neih zawh taka pass a nih angin Budget chhung atanga hlan a ni. LADC hian CEM Relief Fund for COVID-19 atanga buhfai quintal 1000 an lei chu an sem chhuak mek a. Hei bakah hian, CEM Relief Fund atang hian ramri-a duty-te leh hri dona kawnga hma latu hrang hrang hnenah pawisafai an lo sem tawh bawk a ni.

Thawktu mi 7 rawih sak
Agriculture Minister, C. Lalrinsanga chuan COVID-19 do kawnga thawktute indaihlohna chhawk zangkhai anih theih nan ama sum sengin hnathawktu mi 7 chu thla thum (3) chhung atan a ruai a, hemi chungchang hi Lunglei District Chief Medical Officer hnenah ziaka thlenin nimin khan an hna hi an zawm nghal a ni. Agriculture Minister in thawktu mi 7 a rawih te hi B.Sc Nursing, GNM, DMLT, MLT leh Driver pakhat theuh bakah ANM mi 2 te an ni.

MHIP in ngaithiamlo
MHIP General Hqrs. chuan thuchhuah siamin June 15, 2020 zan-a Laldawngiana ni a hriatin a nupui kutthlak a tumna lamah Tualpui nula Lalhlimmawii, Khawzawl Zuchhip-a a awm lai chempui-a a sat chiam mai leh hliam na taka a tuar chu an ngaithiam thei lo tih an tarlang a. A nupui chunga thleng pawh nise hetiang ang thil rapthlak a ti duh chu a phu tawk hremna hmu ngei se an duh thu leh thuneituten Dan anga na taka an hrem ngei an phut thu sawiin, Mizo hmeichhia te chungah kutthlakna leh thihna a thleng fo mai chu pawi an tih thu leh thleng tawh lo se an duh takzet thu an sawi bawk.

Tlawmngai tan inpek theih
Mizoram sawrkar chuan thuchhuah siamin COVID-19 hrileng dona-a hmalakna kal zelah Health & Family Welfare Department hnuaiah COVID-19 do tur mi tlawmngai inpe te buaipuitu tur Team a din a. COVID-19 dona-a mi tlawmngai inpe duhte chuan Hming, Pa hming, Veng/khua, Phone number leh Qualification-te tarlangin email - mzcvolunteers@gmail.com-ah emaw COVID-19 helpline-102, 0389-232336/2318336-ah te in report theih a ni a. Heng mi tlawmngai inpe te hi a tul dan a zirin an tih tur duan sak an ni ang.

Vbc. 9.42 lut tawh
Mizoram sawrkar in thuchhuah siama a tar-lan danin nimin thleng khan COVID-19 dona atan Chief Minister's Relief Fund-ah mi tlawmngai ten sum chhunglut zelin sum lut zawng zawng hi cheng vbc. 9.42 a tling tawh a ni.

Comments

Popular News (Last 30 Days)